Светските берзи забележаа значителен пад, при што фјучерсите на индексот Nasdaq-100 се намалија за повеќе од 2,5 отсто. Причина за тоа се зголемените стравувања дека цените на акциите, особено во технолошкиот сектор, достигнале нивоа што тешко можат да се оправдаат со реалните деловни резултати. Ова предизвика нов бран на нестабилност по двомесечниот силен раст на поризичните инвестиции. Во Јужна Кореа, индексот KOSPI падна за 10 отсто од своето рекордно високо ниво.
Особено погодени беа производителите на мемориски чипови, чии акции оваа година пораснаа за повеќе од 100 отсто. Акциите на „Спејс екс“ (SpaceX) паднаа под почетната цена од 150 долари во претпазарното тргување, пред делумно да закрепнат. Фјучерсите на S&P 500 се намалија за 1,2 отсто, додека технолошкиот сектор беше главен виновник за падот од 0,8 отсто на европските берзи.
Во Сеул, акциите на „СК Хајникс“ (SK Hynix) и „Самсунг“ (Samsung Electronics) загубија повеќе од 10 отсто од вредноста. Во САД, падот го предводеа „Интел“ (Intel) и „Микрон“ (Micron Technology). Во меѓувреме, кинеските акции што се тргуваат во Хонгконг влегоа во таканаречен „мечкин пазар“, што значи дека нивната вредност паднала за повеќе од 20 отсто во однос на претходниот врв.
Овој пад доаѓа во период кога Волстрит се подготвува да ја заврши првата половина од годината со импресивни добивки, при што индексот Nasdaq 100 досега порасна околу 20 отсто. Сепак, инвеститорите сè повеќе се прашуваат дали огромните вложувања во вештачката интелигенција навистина ќе донесат соодветен поврат. Дополнителна загриженост предизвикаа и предупредувањата на јужнокорејските регулатори за ризиците од високо задолжени берзански фондови (ЕТФ/ETF).
„Дел од неодамнешниот раст на акциите беше поттикнат од шпекулативно однесување и желбата на малите инвеститори за брза заработка. Иако денешниот пад не е пријатен, всушност претставува здраво прочистување на пазарот“, изјави Марк Даудинг за телевизијата „Блумберг“.
Вниманието сега е насочено кон финансиските резултати на „Микрон“, кои треба да бидат објавени в среда. Акциите на компанијата пораснаа за повеќе од 300 отсто од почетокот на годината. Аналитичарите очекуваат приходите во третиот квартал да скокнат за околу 254 отсто во споредба со истиот период лани, додека прилагодената нето-добивка би можела да порасне за речиси 790 отсто.
„Вистинскиот тест е 'Микрон'“, смета Аманда Лионс. Според неа, инвеститорите треба повеќе да внимаваат на промените во цените на мемориските чипови и на плановите за капитални инвестиции, отколку на тоа дали кварталните резултати ќе ги надминат или ќе ги разочараат очекувањата.
Во меѓувреме, „Спејс екс“ за првпат издава обврзници со инвестициски рејтинг. Аналитичарите очекуваат ова да биде почеток на голема програма за задолжување со која компанијата ќе финансира амбициозни проекти во областа на вештачката интелигенција, по рекордната иницијална јавна понуда на акции вредна 75 милијарди долари.
Цената на нафтата од типот брент остана стабилна откако претходно достигна најниско ниво од почетокот на конфликтот на Блискиот Исток. Пазарите позитивно реагираат на сигналите дека разговорите меѓу САД и Иран за долгорочен договор започнале охрабрувачки. Дополнително, Вашингтон му одобри на Техеран 60-дневна дозвола за продажба на нафта на светските пазари.
Во исто време, цените на златото, среброто и бакарот се намалија, додека биткоин се движеше кон најголем пад во последните три недели. Американските државни обврзници благо закрепнаа, бидејќи инвеститорите ги намалија очекувањата за нови зголемувања на каматните стапки од страна на Фед во текот на оваа и следната година. Во меѓувреме, американскиот долар се доближи до највисокото ниво во 2026 година.
.webp){kind=icon}
