„СК Хајникс“ вторпат за една недела забележа краткотраен пад од 30 отсто

Гигантот за чипови „СК Хајникс“ (SK Hynix Inc.) претрпе втор краткотраен пад на акциите за околу една недела, што отвори нови прашања за нестабилноста на тргувањето на алтернативната берза во Јужна Кореја.

Во 8 часот по локално време, 11 акции на „СК Хајникс“ биле истргувани по цена од 1.168.000 вони за акција, со пад од дневниот лимит од 30 отсто, покажува „Некстрејд“ (Nextrade), новата берза што е отворена минатата година, која овозможува тргување и пред и по редовното работно време. Акцијата ја заврши 50-минутната предберзанска сесија со пад од околу два отсто.

Акциите на производителот на чипови го завршија редовното тргување во четвртокот на Корејската берза, главната берза во земјата, со пад од 10 отсто, следејќи ја пошироката слабост во секторот по загубите на Волстрит.

Бурното движење на „Некстрејд“ многу потсетуваше на движењето на акцијата минатиот вторник, кога таа исто така падна за 30 отсто во предберзанското тргување, пред потоа да надомести дел од загубите. Инцидентот доведе до ликвидација на долги позиции во вредност од речиси 60 милиони долари за само две минути кај трговците со фјучерси поврзани со акциите на „СК Хајникс“, со кои се тргува на криптоберза.

„Некстрејд“ брзо го зголемува својот пазарен удел во Кореја по отворањето минатата година, благодарение на подолгото време за тргување и пониските надоместоци. Сепак, необични епизоди како краткотрајниот пад на „СК Хајникс“ го засилија надзорот врз алтернативната берза, поради загриженоста дека таквите трансакции го нарушуваат правилното формирање на цените.

Bloomberg

За разлика од повеќето берзи што користат повеќе извори за формирање на цените, „Некстрејд“ соопшти дека користи само еден извор, практика за која тврди дека ја применуваат и повеќето алтернативни берзи во светот.

„За разлика од примарните берзи, каде што функцијата за откривање на цените, како што е утврдувањето на почетната и завршната цена, е од клучно значење, алтернативната берза става поголем акцент на извршувањето на трансакциите“, соопшти „Некстрејд“ во одговор на прашања од „Блумберг њуз“. „Соодветно на тоа, како и водечките глобални алтернативни системи за тргување, „Некстрејд“ го отвора и го води пазарот со континуирана трговска сесија“, се додава во соопштението.

„Некстрејд“ планира од 14 септември да воведе механизам за статички прекин поради ценовна нестабилност, кој треба да спречи повторување на вакви инциденти, изјави портпарол на берзата. Доколку има налози за купување или продажба што се најмалку 10 отсто над или под претходната цена на затворање, ќе се активира механизам што ќе започне двеминутна аукција за утврдување цена по која ќе може да се реализираат најголем број трансакции, додаде тој.

Краткотрајниот пад на акциите на „СК Хајникс“ во предберзанското тргување во четвртокот имаше помало влијание врз тргувањето со криптовалути.

Ликвидациите на фјучерсите поврзани со акциите на производителот на чипови, со кои се тргува на блокчејн-платформата „Хиперликвид“ (Hyperliquid), изнесувале само 230.132 долара, според „Алиум“ (Allium), компанија за аналитика на криптовалути.

„За криптотрговците, ликвидациите на фјучерсите за ’СК Хајникс’ на ’Хиперликвид’ утрово беа мали, бидејќи претходните масовни ликвидации веќе го елиминираа најголемиот дел од позициите со левериџ“, изјави Елтон Шехдула, директор за истражување во „Алиум“.

„Некстрејд“ го проширува пристапот и ја зголемува конкуренцијата, но истовремено воведува и нови ризици во пазарната структура“, рече Шехдула. „Последиците сега се прелеваат и надвор од јужнокорејскиот пазар на акции, бидејќи овие цени може да послужат како репер за деривати со кои се тргува во странство, а кои функционираат според различни правила и можеби нема да ги поништат загубите предизвикани од погрешно формирана цена“, додаде тој.