Нафтата поскапе по тридневен пад, берзите потонаа поради производителите на чипови

Азиските берзи забележаа втор последователен ден на пад, бидејќи инвеститорите продолжија да ги распродаваат акциите на производителите на чипови. Причината е сè поголемиот скептицизам дали огромните инвестиции во вештачка интелигенција (ВИ) навистина ќе донесат очекувани приноси. Во исто време, цената на нафтата значително порасна поради новата ескалација на конфликтот на Блискиот Исток.

Најголем удар претрпе јужнокорејскиот берзански индекс Kospi, кој падна за 9 отсто, откако претходниот ден изгуби 11 отсто. Со тоа индексот е на пат да го забележи најголемиот дводневен пад во својата историја.

Акциите на производителот на мемориски чипови „СК Хајникс“ (SK Hynix) потонаа за дури 20 отсто, иако компанијата објави раст на кварталната добивка од импресивни 557 отсто. Сепак, резултатите не ги исполнија високите очекувања на аналитичарите. Во меѓувреме, акциите на конкурентот „Самсунг“ (Samsung Electronics), кој финансиските резултати ќе ги објави во четврток, паднаа до 14 отсто.

„Со оглед на тоа што 'СК Хајникс' и 'Самсунг' имаат огромно влијание врз индексот Kospi, кога двете компании истовремено паѓаат, инвеститорите практично немаат каде да се засолнат“, изјави Џош Гилберт, главен аналитичар за Азија и Блискиот Исток во „Еторо“ (Etoro Ltd).

Падот во Јужна Кореја го повлече надолу и поширокиот MSCI Asia Pacific Index, кој ослабе за 1,5 отсто и се спушти на најниско ниво од средината на април. Во исто време, фјучерсите на американскиот Nasdaq 100 се намалија за 0,7 отсто, при што технолошкиот индекс забележа пет последователни денови на загуби - најдолга негативна серија годинава. И европските берзи се очекува да отворат со пад.

Нафтата повторно расте поради тензиите на Блискиот Исток

Дополнителен притисок врз финансиските пазари создаде наглиот раст на цената на нафтата. Суровата нафта брент поскапе за речиси 4 отсто и повторно се искачи над 87 долари за барел, закрепнувајќи по најголемиот тридневен пад од април 2020 година.

Растот следеше откако САД соопштија дека спречиле ненадеен напад од Иран врз американски војници и возвратиле со воени напади врз цели во Иран. Истовремено, американскиот долар ослабе.

Цената на нафтата скокна по тридневен пад

Брент расте додека борбите на Блискиот Исток повторно се разгоруваат Bloomberg

 

Новите судири повторно го насочија вниманието кон Ормускиот Теснец, една од најважните светски поморски рути за транспорт на нафта. Потенцијалните прекини во снабдувањето би можеле повторно да ја забрзаат инфлацијата токму во период кога пазарите ја очекуваат одлуката на американската централна банка - Федералните резерви (Фед).

„Остануваме претпазливи кон секој можен договор што нема јасно да го реши прашањето со Ормускиот Теснец, бидејќи несогласувањата околу неговото управување доведоа до иранската агресија и до брз неуспех на претходниот меморандум за разбирање“, изјави Рајан Мекеј, висок стратег за суровини во ТДС (TD Securities).

Големите технолошки компании продолжуваат агресивно да инвестираат во развој на вештачка интелигенција, но сè повеќе инвеститори се прашуваат дали тие инвестиции се преголеми.

„СК Хајникс“ годинава планира капитални инвестиции од најмалку 31 милијарда долари, што е рекордно ниво за компанијата. Минатата недела и „Алфабет“ (матичната компанија на „Гугл“) ја зголеми прогнозата за капитални расходи на дури 205 милијарди долари во текот на оваа година.

И покрај тоа што многу компании објавуваат финансиски резултати подобри од очекувањата, нивните акции продолжуваат да паѓаат бидејќи инвеститорите се загрижени дека трошоците за ВИ можеби ќе бидат преголеми во однос на идните приходи.

Во последниот месец, додека технолошките акции се под силен притисок, најдобри резултати на азиските берзи бележат компаниите од секторите потрошувачка, финансии и енергетика, покажуваат податоците на „Блумберг“.

Индексот што ги следи производителите на чипови на Волстрит падна за 4,5 отсто, а тоа дополнително го приближи Nasdaq 100 до таканаречена техничка корекција.

„Првично, корекцијата кај производителите на полупроводници беше предизвикана од преголемиот оптимизам околу ВИ. Но последниот забрзан пад повеќе се должи на позиционирањето на инвеститорите, принудната продажба и психологијата на пазарот отколку на реалните фундаментални показатели“, оцени Раџив Де Мело, портфолио-менаџер во ГАМ (Gama Asset Management).

Пазарите сега со големо внимание ги очекуваат финансиските резултати на најголемите американски технолошки компании. Во среда извештаи ќе објават „Мајкрософт“ и „Мета“, а ден подоцна „Епл“ и „Амазон“.

Паралелно, инвеститорите внимателно ја следат и дводневната седница на Федералните резерви (Фед). Се очекува каматните стапки да останат непроменети, но дел од пазарот не ја исклучува можноста за неочекувано зголемување поради сè уште високата инфлација.

В четврток одлука ќе објави и Банката на Англија, а во петок и Банката на Јапонија.

Аналитичарите на „ЏП Морган“ (JPMorgan Chase) сметаат дека шансите за ново зголемување на каматните стапки се помали од околу 30 отсто, колку што моментално проценуваат финансиските пазари. Според нив, инфлацијата останува покачена, но не покажува знаци на неконтролирано забрзување. Истовремено, тие проценуваат дека постои околу 50 отсто веројатност Фед да ја задржи сегашната каматна стапка, но да испрати порака дека ќе остане внимателен и подготвен да реагира доколку инфлаторните ризици повторно се зголемат.