Паѓа цената на нафтата, инвеститорите ѝ се вратија на вештачката интелигенција

Глобалниот раст на технолошките акции доби дополнителен замав, откако јужнокорејските акции забележаа рекорден скок, а инвеститорите повторно се вратија кон трговијата поврзана со вештачката интелигенција (ВИ) по распродажбата оваа недела. Јенот ослабна, враќајќи дел од добивките што ги оствари благодарение на интервенцијата.

Индексот Kospi порасна дури за 18 отсто, закрепнувајќи по тридневната распродажба. Големиот производител на чипови „СК Хајникс“ (SK Hynix Inc.) се искачи до дневниот лимит од 30 отсто, а „Самсунг“ (Samsung Electronics Co.) порасна дури за 27 отсто - со што двете компании станаа најголеми придонесувачи за индексот на акции MSCI Asia Pacific.

Добивките во Азија следуваа по најголемиот раст на акциите на производителите на чипови на Волстрит во повеќе од една година. Фјучерсите на Nasdaq 100 укажуваа на понатамошни добивки, откако технолошки ориентираниот индекс ја прекина шестдневната серија на падови. „Амазон“ (Amazon.com Inc.) скокна за 9,5 отсто во тргувањето по затворањето на берзата, откако силните финансиски резултати го подобрија расположението на пазарот, додека „Епл“ (Apple Inc.) падна за повеќе од 6 отсто, бидејќи недостигот од снабдување влијаеше врз прогнозата за продажбата.

Падот на јенот значеше дека валутата врати дел од најголемата добивка во однос на доларот во повеќе од две години, остварена во четвртокот по уште една интервенција на властите. Валутата ги продолжи загубите откако Банката на Јапонија, како што и предвидуваа економистите, ги остави каматните стапки непроменети. Американските државни обврзници пораснаа, додека цената на нафтата продолжи да паѓа.

Закрепнувањето на производителите на чипови им донесе олеснување на инвеститорите по распродажбата оваа недела, предизвикана од загриженоста дека милијардите долари што се вложуваат во вештачката интелигенција можеби нема да донесат соодветен поврат. Откако одлуката за монетарната политика под новиот претседател Кевин Ворш веќе е зад нив, инвеститорите сега се насочуваат кон прашањето дали закрепнувањето може да се одржи по мешаниот сет на финансиски резултати од неколку компании со огромна пазарна капитализација.

„Се обложувам против одржливоста на овој раст, бидејќи условите создадени од Ворш не се поволни за стабилни пазари“, изјави Метју Хаупт, менаџер на хеџ-фонд во ВАМ (Wilson Asset Management). „Има премногу нерешени прашања за да се воспостави одржлив раст.“

Во САД беа забележани големи добивки кај акциите, кои, заклучно со првиот квартал, беа меѓу најголемите вложувања на СА (Situational Awareness). Хеџ-фондот, предводен од поранешниот истражувач на „Опен еј-ај“ (OpenAI), Леополд Ашенбренер, претходно продаде голем дел од своите вложувања на „Ситадел“ (Citadel), откако ги ликвидираше акциите погодени од распродажбата поврзана со вештачката интелигенција.

Индексот Nasdaq 100 во четвртокот порасна за повеќе од три отсто, прекинувајќи ја шестдневната серија на падови. Фјучерсите за овој индекс беа повисоки за 1,2 отсто во азиското тргување.

Фјучерсите исто така укажуваа на понатамошни добивки за индексот S&P 500 и за европските акции, откако индексот MSCI Asia Pacific порасна за 4,2 отсто. Индексот што ги следи азиските компании за производство на чипови скокна за 12 отсто, поставувајќи се на пат кон рекорден еднодневен раст.

„Најтешката задача за инвеститорите сега е да утврдат дали ова е одржливо закрепнување или само ‘скок на мртва мачка’“, изјави Веј-Серн Линг, извршен директор во УБП (Union Bancaire Privee).

Што велат стратезите на „Блумберг“...

Растот низ азиските технолошки сектори во петокот е толку силен што претставува зрак надеж на крајот од многу тежок јули за расположението во регионот. Овие растови ќе ја поттикнат приказната дека расчистувањето на позициите со финансиски лост создава посолидна основа за одржлив, а можеби и постабилен раст во иднина.

— Гарфилд Рејнолдс, раководител на тимот „Маркетс лајв“

Индексот на доларот на „Блумберг“ порасна за 0,2 отсто, прекинувајќи ја петдневната серија на падови. Приносот на 30-годишните американски државни обврзници во петокот се намали за два базични поена, на 5,19 отсто. Намалувањето на приносите следуваше откако тие претходно оваа недела достигнаа највисоки нивоа во повеќе години, бидејќи одлуката на Федералните резерви да ги задржат каматните стапки непроменети ја засили загриженоста околу високата инфлација.

Златото се тргуваше околу 4.075 долари за унца. Нафтата поевтини, при што суровата нафта брент падна за 2 отсто, на околу 87,10 долари за барел. И покрај тоа, глобалниот репер сè уште е повисок за околу една петтина овој месец.

Сепак, вниманието во Азија беше насочено кон Банката на Јапонија. Сите 52 економисти анкетирани од „Блумберг“ прогнозираа дека Банката на Јапонија ќе ја задржи референтната каматна стапка непроменета на крајот од дводневниот состанок, додека го проценува влијанието од минатомесечното зголемување.

Вниманието сега се префрла на попладневната прес-конференција на гувернерот Казуо Уеда и на сите негови коментари поврзани со валутата.

Најважни корпоративни вести:

* Според „Волстрит журнал“, на раководителите на „Тесла“ им било кажано да се подготват за издвојување на кинескиот бизнис пред можно спојување, изјавило лице запознаено со разговорите.

* „Кредит Агрикол“ објави резултати подобри од очекуваните за вториот квартал, бидејќи приходите пораснале во францускиот малопродажен банкарски сектор, а одделот за управување со средства остварил рекордна добивка.

* „Мета“ соопшти дека веќе презела обврски за идни трошоци од речиси 700 милијарди долари, преку долгорочни и краткорочни договори поврзани со центри за податоци за вештачка интелигенција, облачно пресметување и други проекти.

* Главниот извршен директор на „Квалком“, Кристијано Амон, изјави дека побарувачката за паметни телефони останува силна, но растечките трошоци за нивно производство го задржуваат пазарот во пад.

* „Антропик“ објави дека нејзините модели за вештачка интелигенција успеале да пробијат три различни организации за време на тестови за сајбер-безбедност што тргнале во погрешна насока, нешто повеќе од една недела откако нејзиниот главен конкурент „Опен еј-ај“ откри сличен инцидент.

* „Сони“ ја зголеми прогнозата за добивката откако неговите профитабилни содржински бизниси продолжија да бележат раст, нагласувајќи ја отпорноста на групацијата и покрај растечките цени на компонентите.