„Антропик“ планира мега-ИПО пред Денот на благодарноста

Компанијата „Антропик“ (Anthropic PBC) планира да излезе на берза најрано до средината на ноември, откако претходно ги одложи плановите за котација, според луѓе запознаени со ситуацијата.

Компанијата што стои зад моделот Клод би можела да започне со формален маркетинг за својата иницијална јавна понуда (IPO) уште во неделата од 9 ноември, што би овозможило почеток на тргувањето пред Денот на благодарноста. Вообичаено, деловните активности забавуваат или запираат во деновите околу овој празник, кој годинава се паѓа на 26 ноември.

Се очекува „Антропик“ сепак да дебитира на берзата најдоцна до крајот на годината, велат изворите. Како што претходно објави „Блумберг њјуз“, развивачот на вештачка интелигенција беше подготвен јавно да поднесе барање за иницијална јавна понуда уште по завршувањето на летото.

Разговорите се во тек и временската рамка може дополнително да се менува, велат изворите, кои побараа да останат анонимни бидејќи информацијата сè уште не е јавно објавена.

„Антропик“, која бележеше голем подем во поголемиот дел од оваа година, сега се соочува со обновена конкуренција од компании како „Опен еј-ај“ (OpenAI), која во последните месеци забележа раст на продажбата. Овие компании се исто така во центарот на зголемениот јавен интерес и контрола во врска со безбедноста на вештачката интелигенција, особено по низата високопрофилни хакерски инциденти предизвикани од злонамерни актери, што ја зголеми загриженоста за потенцијалното влијание врз излегувањето на „Антропик“ на берзата.

Извршниот директор Дарио Амодеи објави есеј на својата лична веб-страница во кој тврди дека мора да се забави темпото со кое напредуваат новите модели на вештачка интелигенција. „Опен еј-ај“, главниот ривал на „Anthropic“, ги одложи своите планови за ИПО, при што извршниот директор Сем Алтман оцени дека не би било мудро да се излезе на берза во овој момент.

Се чини дека оваа загриженост не ги обесхрабрила потенцијалните инвеститори, кои сметаат дека фер вреднувањето на „Anthropic“ се движи во опсег од 1,8 до 2 билиони долари, велат некои од изворите. Компанијата очекува да ја израмни или надмине големината на ИПО-то на „Спејс екс“ (SpaceX), објави „Блумберг њјуз “.

„Антропик“ забележа нето-загуба од речиси 42 милијарди долари во 2025 година, што претставува зголемување од околу пет пати во споредба со 8,3 милијарди долари претходната година, објави „Блумберг њјуз“ во август. Вкупниот годишен приход на компанијата за 2025 година изнесуваше околу 4,6 милијарди долари, што е значителен пораст од 386 милиони долари претходната година, иако оперативната загуба нагло порасна на повеќе од 8 милијарди долари, според документи до кои дојде „Блумберг њјуз“.

Најголемиот дел од нето-загубата се должи на наглиот пораст на промената во фер вредноста на обврските на „Антропик“, кои сочинуваа повеќе од 34 милијарди долари од годишните загуби на компанијата, покажуваат документите.

 

„Ројтерс“ претходно објави некои детали за вреднувањето и финансиските податоци поврзани со иницијалната јавна понуда (IPO). Претставник на „Антропик“не беше во можност веднаш да одговори на барањето за коментар.

Доколку продолжи со процесот на ИПО, Anthropic ќе се спротивстави на низата одложувања и пролонгирања на пазарот за нови котации. „Оура“ (Oura Inc) беше третата компанија во рок од неколку недели што официјално го одложи своето деби само неколку часа пред планираната првична продажба на акции, откако некои потенцијални купувачи изразија резервираност кон целната вредност од околу 15 милијарди долари (пресметана врз основа на целосно разредена сопственичка структура).

Голем број други компании забележаа поместување на планираните рокови, бидејќи резултатите на овогодишната групација на компании што излегоа на берзата беа незадоволителни. Ако се исклучат рекордно успешните котации на „Спејс екс“ и „СК Хајникс“ (SK Hynix Inc), пондерираниот просечен принос за повеќе од 100-те новокотирани акции претставува загуба од 4 проценти, покажуваат податоците собрани од „Блумберг“. Оваа бројка значително заостанува зад приносот од 12 проценти на индексот S&P 500 и растот од 20 проценти на технолошки ориентираниот индекс Nasdaq 100 во текот на оваа година.

— Со помош на Ширин Гафари и Дина Бас