Волстрит поттикнат од надежта дека нема да дојде до рецесија

Американските берзански индекси пораснаа во четвртокот бидејќи инвеститорите се надеваат дека најголемата светска економија може да избегне рецесија по извештајот за американскиот бруто домашен производ (БДП).

Бруто домашниот производ на САД порасна со стапка од 2,9 отсто на годишно ниво во последните три месеци од 2022 година, откако порасна за 3,2 отсто во третиот квартал, покажа првичната проценка на американското Министерство за трговија во четвртокот. Економистите очекуваа раст од 2,6 отсто во тој квартал.

Поттикнати од оваа вест, берзанските индекси на Волстрит почнаа да растат. Dow Jones зајакна 0,61 отсто, на 33.949 поени, додека S&P 500 порасна за 1,10 отсто, на 4.060 поени, а Nasdaq индексот порасна за 1,76 отсто, на 11.512 поени. Со други зборови, S&P 500 го заврши денот на највисоко ниво во последниот месец, како одраз на растот на технолошките акции. Исто така, индексот Nasdaq е на највисоките нивоа од септември.

Се очекува ФЕД да ги зголеми каматните стапки за дополнителни 25 базични поени следната недела. Во декември, зголемувањето на каматната стапка изнесуваше 50 базични поени по растот од 75 базични поени на претходните четири средби.

Во четвртокот имаше оптимизам и на европскиот пазар на капитал. Лондонскиот FTSE индекс зајакна за 0,21 отсто, на 7.761 поен, франкфуртскиот DAX порасна за 0,34 отсто, на 15.132 поени, а парискиот CAC зајакна за 0,74 отсто, на 7.095 поени.

Азиските берзи пораснаа шести ден по ред, поттикнати од растот на американските технолошки акции и отворањето на Кина. Јенот зајакна по објавувањето на податоците дека инфлацијата во Јапонија ги надмина очекувањата и се искачи на највисоките нивоа од 1981 година. Јенот зајакна 0,2 отсто и се тргуваше по 130,01 јени за долар. Приносот на јапонската 10-годишна обврзница се зголеми за еден базичен поен, на 0,47 отсто.

Доларот зајакна за 0,1 отсто, еврото ослабе за 0,2 отсто, на 1,0870 долари. Британската фунта падна за 0,2 отсто на 1,2385 долари.

Биткоинот се лизна за 1,1 отсто на 22.820 долари, а етерот се лизна за 2,4 отсто на 1.565 долари.

Приносот на десетгодишната американска обврзница порасна за три базични поени, на 3,53 отсто, а приносот на австралиската обврзница порасна за седум базични поени, на 3,57 отсто.

Фјучерсите на сурова нафта West Texas Intermediate (ВТИ) пораснаа за 0,4 отсто на 81,37 долари за барел. Цената на златото падна за 0,4 отсто на 1.921 долар за унца.

Во моментов нема коментари за веста. Биди прв да коментира...

Остави коментар