Стрес на берзите по најавата од ОПЕК+ за помало производство на нафта

Терминските договори за акции се во сенка, а доларот ги зголеми приносите на обврзниците бидејќи неочекуваното намалување на производството на нафта од страна на Организацијата на земји извознички на нафта и нивните сојузнички (ОПЕК+) доведе до значаен раст на цената на нафтата. Одлуката на картелот да го намали производството за повеќе од еден милион барели дневно утрово дојде како сериозен потрес на глобалните пазари. Тоа одекна во сите класи средства, бидејќи инвеститорите побрзаа да се приспособат на ризиков дека инфлаторниот притисок може да трае повеќе отколку што се мислеше.

 

 

По петочниот раст од 1,4 отсто, индексот S&P 500 утрово падна за 0,3 отсто. Истата судбина ја дели и технолошкиот индекс Nasdaq 100, кој во петокот порасна за 1,7 отсто, а утрово се соочи со пад од 0,6 отсто. Поголемите индекси во Азија имаат различни резултати на почетокот од овонеделното тргување, па така, хонгконшкиот индекс падна за 0,6 отсто, но јапонскиот, кинескиот и австралискиот пораснаа меѓу 0,6 и 0,7 отсто.

Доларот ги зголеми добивките втор ден по ред и зајакна во однос на валутите од групата 10 најтргувани и во однос на еврото сега зелената банкнота се тргува по курс од 1,0794 долар за евро. 

Приносот од двегодишните обврзници, кои се чувствителни на политиките, скокна за околу осум базични поени, враќајќи го на 4,1 отсто додека трговците ја одмеруваа најавата на ОПЕК+, од каде што претходно дадоа гаранции дека понудата ќе ја одржат стабилна. Инаку, обврзниците го завршија првиот квартал во петокот со пад на приносите, бидејќи инвеститорите се обложуваа дека на повидок се намалувања на каматните стапки.

„За инвеститорите во капитал, ова би можело да биде грубо будење бидејќи пазарите имплицираат на изгледите за намалување на каматните стапки, но не и рецесија. Намалувањето на производството на ОПЕК+ е уште еден потсетник дека џинот на инфлацијата не е вратен во шишето“, рече Роналд Темпл, главен пазарен стратег во „Лазард“ (Lazard Ltd) во Њујорк.

„Голдман Сакс“ (Goldman Sachs Group Inc.) ја ревидира својата прогноза за цената на суровата нафта од типот брент токму поради најавата за намалување на производството, проектирајќи таа да достигне 95 долари за барел оваа година и 100 долари во декември 2024 година.

Стресното отворање на понеделничкото тргување и стравувањата од пораст на цените се во контраст со оптимистичкиот тон што владееше минатата недела, а дојде со повлекувањето на превирањата во банкарскиот сектор и заладувањето на клучната мерка за инфлацијата во САД. Со исклучок на храната и енергијата, преферираниот мерач на инфлацијата на Федералните резерви (ФЕД), индексот на цените на трошоците за лична потрошувачка, се зголеми за 0,3 проценти во февруари, малку под просечната процена. Тоа сугерираше дека ФЕД можеби е блиску до завршување на својата кампања за зголемување на стапката.

Индексот на потрошувачките цени порасна за пет проценти на годишно ниво, што претставува забавување од јануари, но и натаму е многу повисоко од целта на ФЕД дека инфлацијата треба да биде два отсто.

Намалувањето на производството од страна на ОПЕК+, во комбинација со зголемената побарувачка на енергија од Кина, ќе ја зголеми опасноста од потрајна инфлација, сметаат од „Лазард“.

Цената на златото утрово потона за 0,9 отсто, на 1.951,70 долар за унца.

Ниту криптопазарот не е поштеден од негативната слика. Откако најголемиот токен, биткоинот, го забележа својот најдобар квартал во последните две години, со добивка од околу 70 проценти во првите три месеци годинава, утрово падна дури за 1,4 отсто, на 27.680,75 долари, а цената на етерот се намали за 0,8 проценти и сега изнесува 1.775,77 долари.

Во моментов нема коментари за веста. Биди прв да коментира...

Остави коментар