Берзанските индекси паѓаат, криптовалутите растат

Најголемите индекси на светските берзи паднаа поради загриженоста за патот на глобалната монетарна политика и здравјето на американските банки.

Индексот S&P 500 падна за 0,6 отсто, а технолошкиот индекс Nasdaq 100 загуби 0,4 отсто од вредноста. Јапонскиот индекс падна дури за 1,9 отсто. Кинеските пазари се затворени поради празник.

Мерката за вредноста на зелената валута беше малку променета, бидејќи повеќето главни валути се тргуваа во тесен опсег. Еврото сосема малку се промени во однос на американскиот долар и тие валути се тргуваат по курс од 1,0955 долар за едно евро. 

Приносите на двегодишните државни обврзници на нацијата се зголемија за околу 12 базични поени, бидејќи податоците во САД покажаа пад на отворените работни места. Тоа ги зајакна облозите дека Федералните резерви (ФЕД) наскоро ќе ја завршат својата кампања за заострување на монетарната политика во обид да се заузди инфлацијата.

Обврзниците минаа низ еден од најтурбулентните квартали во годините, додека трговците дебатираа за изгледите за инфлација поради стравувањата од прелевање на превирањата во банкарскиот сектор. „Пазарите на обврзници се соочуваат со несигурност во однос на тоа што ќе направат централните банки“, смета Васу Менон, извршен директор за инвестициска стратегија во „Оверси“ (Oversea-Chinese Banking Corp). во Сингапур.

„Уште колку може да направат ако се земе предвид дека досега направија многу, а инфлацијата не покажува голем пад кон целните два-три проценти што ги имаат повеќето од централните банки“, рече тој во гостувањето на телевизијата „Блумберг“.

Раководителот на „ЏП Морган Чејс“ (JPMorgan Chase & Co), Џејми Дајмон, предупреди дека банкарската криза во САД, која ги загрижи пазарите минатиот месец, ќе се чувствува со години.

„Мислам дека Џејми е во право во смисла дека ова можеби не е последниот чевел што треба да се скине. Ќе има пошироки последици врз цените на берзата, како и врз заработката“, рече Ејми Конг, главна инвестициска директорка во „Барет асет менаџмент“ (Barrett Asset Management), исто така во гостување на телевизијата „Блумберг“.

Слободните работни места кај американските работодавци потонаа во февруари на најниско ниво од мај 2021 година, покажа анкетата за отворање работни места и промет на работна сила што американското министерство за труд ја објави вчера. Податоците беа под сите процени во истражувањето на „Блумберг“.

Инаку, нема голема промена кај златото, кое ја зголеми својата вредност за 0,1 отсто, со што унца сега чини 2.022,92 долара.

Позитивата и натаму е присутна на криптопазарот. Имено, биткоинот порасна за еден отсто, искачувајќи се на 28.537,97 долари, а етерот ја зголеми својата вредност за 1,7 отсто и сега чини 1.910,17 долари.