Слабо е расположението на инвеститорите на берзите

Овој ден го опишуваме како негативен за берзите. Имено, индексот S&P 500 падна за 0,3 отсто, а технолошкиот индекс Nasdaq 100 загуби дури еден отсто од вредноста. На азиските пазари не е ништо поинаку. Таму загубата на најголемите берзански индекси започнува од минимумот, а завршува со минус од 1,2 отсто, регистриран кај јапонскиот индекс Topix.

Причина за ваквото расположение на пазарите е што статистичките податоци ги поддржаа прогнозите за рецесија.

Движење на индексите / Bloomberg Mercury

 

„Ова ќе бидат неколку тешки квартали за глобалните акции. Не гледаме рецесија во САД оваа година и тоа позитивно ќе изненади некои инвеститори“, рече Џон Вејл, главен глобален стратег за „Нико асет менаџмент“ (Nikko Asset Management), во интервју за телевизијата „Блумберг“.

Индексите на доларот и јенот го продолжија напредокот од вчера, иако минимално. Златото благо падна, но остана блиску до највисокото ниво во последните 13 месеци, постигнато во претходната сесија.

Летот кон безбедно е одраз на знаците за забавување на американската економија пред објавата на клучните податоци денеска и утре.

Ниту криптопазарот не отскокнува од денешната слика со слабо расположение на инвеститорите. Таму најголемиот токен, биткоинот, падна за 0,4 проценти, на 28.039 долари, а исто толкав процент од вредноста загуби и етерот, така што тој сега се тргува по цена од 1.898,75 долари.