Резервираност на берзите, се чекаат податоците за инфлацијата во САД

Азиските берзи се откажаа од голем дел од своите добивки, бидејќи трговците го одмеруваат потенцијалот на податоците за американската инфлација, кои треба да бидат објавени денеска, да ја поттикнат нестабилноста на глобалните пазари.

Така, утрово индексот S&P 500 е сосема малку променет, додека технолошкиот индекс Nasdaq 100 загуби 0,7 отсто од вредноста. Слично е и во Азија, каде што берзанските индекси се движат од пад од 0,6 отсто до раст од 0,7 отсто.

Мерачите на азиско-пацифичките акции и фјучерсите во САД беа рамни, што е знак дека инвеститорите се воздржуваат да заземат нови позиции пред објавувањето на податоците, што се смета за клучна информација за следната одлука за политика на Федералните резерви (ФЕД).

Двегодишните приноси на државните обврзници останаа над четири проценти, додека еврото ја задржува вчерашната добивка во однос на американскиот долар, со што сега се тргуваат по курс од 1,0924 долар за евро.

Се очекува вкупната инфлација во САД да забави, при што прогнозата за основни читања ќе се намали и на месечна и на годишна основа. Со тоа се очекува и индексот S&P 500 да се намали најмалку за два отсто, напиша партнерот на „Голдман Сакс“ (Goldman Sachs Group Inc), Џон Флод.

Bloomberg Mercury

 

Претставниците на ФЕД вчера понудија различни коментари за натамошните зголемувања на каматните стапки, при што претседателот на ФЕД во Чикаго, Остин Гулсби, тврди дека централната банка треба да покаже претпазливост и трпение. Претседателот на ФЕД Њујорк, Џон Вилијамс, рече дека функционерите треба да направат повеќе за да се справат со инфлацијата.

„Сликата на инфлацијата за нас во САД е сè уште многу, многу измешана. Тоа сигурно не е во согласност со брзото приспособување на падот на каматните стапки. Ние воопшто не го прифаќаме тој поглед“, рече Двајфор Еванс, раководител за азиско-пацифичката макростратегија на „Стејт стрит“ (State Street Global Markets), во гостувањето на телевизијата „Блумберг“.

Златото поскапе за 0,7 отсто, искачувајќи се над психолошката граница од 2.000. Поточно, цената на унцата утрово е 2.017,24 долари.

На криптопазарот расположението е значајно послабо. Вредноста на најголемиот токен, биткоинот, падна за 0,8 отсто, на 29.953,43 долари. Со тоа криптовалутата повторно се врати во зоната под 30.000 долари, граница што успеа да ја мине во текот на вчерашното тргување. Етерот, пак, падна за 1,6 отсто и сега се тргува по цена од 1.864,09 долари.