Азиските акции растат, вредноста на доларот паѓа

По првичниот пад на акциите, сега тие се во фаза на закрепнување бидејќи инвеститорите ги оставија настрана коментарите на ФЕД против намалувањата на каматните стапки и гледаат напред кон евентуален пресврт и олеснување на монетарната политика. Ова следува откако синоќа ФЕД ги зголеми каматните стапки за 25 базични поени и ја отвори вратата за пауза во јуни, но ја намали можноста за намалување на каматните стапки подоцна во годината, сценарио што цврсто се рефлектира на пазарните цени.

Индексот S&P 500 падна за 0,7 отсто, а технолошкиот Nasdaq 100 загуби 0,6 отсто од вредноста. Европскиот индекс Euro Stoxx 50 се намали за само 0,1 отсто, додека азиските берзански индекси се со мешани резултати и движат од пад од 0,2 отсто до раст од еден процент.

Мерачот на акции низ Азија е на пат да оствари најдобар ден во последните три недели, потпомогнат од напредокот на акциите во Хонгконг. Акциите во Кина се зголемија во продолжението од тргувањето по тридневната пауза, а австралиските и јужнокорејските акции го намалија првичниот пад.

Договорите за S&P 500 и Nasdaq 100 беа умерено повисоки по вчерашниот пад, кога превирањата во американските регионални банки ја зголемија нестабилноста на пазарот.

„Затегнувањето на кредитните услови ќе изврши значителен надолен притисок врз економијата. Ќе видите дека ФЕД е во позиција да ја придвижи политиката кон помалку рестриктивен став порано од тоа што го предложи претседателот на ФЕД“, рече Мишел Жирар, раководител на САД за „Нет вест маркетс“ (NatWest Markets), во гостувањето на телевизијата „Блумберг“.

Дебатата за стапките ќе продолжи повторно во текот на денешниот ден, при што Европската централна банка (ЕЦБ) и очекуваната одлука од оваа институција ќе заземат централно место.

Индексот на „Блумберг“ за вредноста на доларот падна трет ден по ред. Според тоа, еврото ја зголеми вредноста во однос на доларот, искачувајќи се на ниво од 1,1081 долар за евро. Златото претрпе сосема мали промени.

На криптопазарот има позитивно расположение меѓу инвеститорите, па најголемиот токен, биткоинот, порасна за 1,8 отсто, на 29.036,33 долари, додека етерот ја зголеми својата вредност за 1,4 отсто, на 1.900,13 долари.

Во моментов нема коментари за веста. Биди прв да коментира...

Остави коментар