Нестабилната светска економија и натаму претставува кочница за берзите

Мерачот на азиските акции утрово забележа мала добивка, главно поддржана од растот на акциите во Хонгконг поради надежите за стимулација во Кина и позитивниот знак во геополитиката.

Индексот S&P 500 утрово порасна за 0,2 проценти, а Nasdaq 100 незначително се промени. Јапонскиот индекс Topix падна за 0,4 проценти, хонконшкиот порасна за еден отсто, а австралискиот се покачи за 0,2 проценти.

Хонконшкиот индекс напредуваше кон своето највисоко затворање во повеќе од две недели, додека технолошката мерка на пазарот скокна за околу двојно повеќе. Јапонските акции ги избришаа добивките поради продажбата во секторот за електрични апарати и растот на јенот. Со оглед на тоа што трговците бараат поголема владина помош за поддршка на слабото економско закрепнување на Кина, оптимизмот за стимулации се зголемува откако властите побараа од најголемите банки во земјата да ги намалат своите каматни стапки на депозитите. „Блумберг економикс“ очекува Народната банка на Кина да ја намали својата едногодишна референтна каматна стапка најдоцна во средината на јуни.

Во меѓувреме, американскиот државен секретар Антони Блинкен планира да ја посети Кина во наредните недели, обезбедувајќи простор за подобрување на напорните односи меѓу Вашингтон и Пекинг, кои ги оптоваруваат акциите во Хонгконг и Шангај.

Главниот стратег за кинески капитал на „Морган Стенли“, Лаура Ванг, рече дека оваа година очекува раст на заработката од девет проценти како резултат на поддршката од владините мерки. Сепак, акциите во континентална Кина ги избришаа малите добивки откако трговските податоци покажаа дека извозот во мај падна повеќе од очекуваното.

Фјучерсите на американските акции утрово се стабилни. Иако падот на „Епл“ (Apple Inc.) ги намали добивките, референтната вредност сè уште се зголеми за 0,2 проценти.

На валутните пазари, мерачот на јачината на зелената валута падна за 0,1 отсто. Курсот евро-долар утрово е речиси непроменет и изнесува 1,0693 долар за евро. Јенот поскапе, а турската лира падна за речиси три проценти, на рекордно ниско ниво.

Расположението на глобалните пазари е претпазливо околу некои прашања, на пример дали цените се зголемија премногу брзо поради возбудата за вештачката интелигенција.

Кај стоките, златото беше малку променето. Пченицата порасна откако Украина соопшти дека руските сили разнеле огромна брана на југот на земјата.

Светската банка во вчерашниот извештај соопшти дека глобалната економија е во несигурна ситуација бидејќи наглите зголемувања на каматните стапки ја погодуваат активноста и ги поттикнуваат ранливостите во земјите со пониски приходи. Тие стравови ги потиснаа акциите. Но со оглед на тоа што стапката на американската инфлација сè уште е висока, трговците сè повеќе очекуваат дека Федералните резерви ќе ги одржат стабилни стапките на состанокот во јуни. Поранешниот потпретседател Ричард Х. Кларида вчера исто така рече дека е малку веројатно американската централна банка да почне да ги намалува стапките до 2024 година.

Нема значајни поместувања ниту на криптопазарот, каде што биткоинот падна за 0,2 проценти, на 26.869,13 долари, а етерот се тргува по цена од 1.878,48 долари.