„Епл“ на берзата може да порасне за уште 30 отсто

„Епл“ (Apple Inc.) има простор да порасне дополнителни 30 отсто, според аналитичарите од „Ситигруп“ (Citigroup), дури и по скокот што ги доведе акциите до рекордно висока вредност и ја насочи компанијата кон пазарна вредност од три билиони долари.

Аналитичарот Атиф Малик започна да го следи производителот на ајфони со препорака за купување и целна цена од 240 долари, што е највисока меѓу аналитичарите од Волстрит. Акцијата веќе порасна за 46 отсто оваа година и беше на рекордно високо ниво од 189,59 долари на затворањето на тргувањето во четвртокот. Во тргувањето по работното време, акциите пораснаа за 0,2 отсто, покажаа податоците во 18:17 часот по њујоршко време.

„Епл“ порасна за 0,3 отсто во продолженото тргување, со што се приближи до историска пазарна капитализација од три билиони долари. Компанијата го заврши тргувањето во четвртокот со вредност од 2,98 билиони долари.

Малик пишува дека инвеститорите ја потценуваат можноста за натамошно проширување на бруто-маржите на „Епл“, што е поттикнато од преминот кон поскапи модели на ајфон, како и преку понатамошно зголемување на пазарниот удел во Кина и Индија. Тој додава дека компанијата „успешно го надминува забавувањето на макроекономијата и инфлацискиот притисок врз потрошувачката со континуирано освојување на удел во однос на андроид телефоните“.

Акции на „Епл“ Bloomberg

По препораката на „Сити“, 68 отсто од фирмите што ги следи „Блумберг“ препорачуваат купување на акции на „Епл“. Сепак, ова е помал процент во споредба со другите технолошки компании со огромна пазарна капитализација. Повеќе од 85 проценти од аналитичарите препорачуваат купување на акции на „Мајкрософт“ (Microsoft Corp.) и „Алфабет“ (Alphabet Inc.), додека околу 94 отсто од аналитичарите препорачуваат купување на акции на „Амазон“ (Amazon.com Inc).