Мечкин пазар во САД, акциите тонат

Американските акции вчера паднаа на најниско ниво од почетокот на јуни бидејќи довербата во економијата спласна по најавите за долг период на високи каматни стапки. Доларот ја продолжи својата победничка серија веќе петти ден по ред.

Индексите S&P 500 и Nasdaq 100 паднаа за 1,5 проценти, откако извештајот за довербата на потрошувачите во најголемата светска економија покажа рекорден пад во последните четири месеци. Cboe Volatility Index или VIX - се зголеми, достигнувајќи највисоко ниво од крајот на мај. MSCI All Country World Index, кој важи за еден од најшироките показатели за глобалните акции, падна осми ден по ред, што се совпаѓа со најдолгата серија загуби во изминатата деценија.

„Пазарот е во рацете на мечките во моментов“, рече Квинси Крозби, главен глобален стратег за „ЛПЛ Фајненшл“ (LPL Financial). „Постои ѕид од загриженост, неизвесност што лебди над пазарот. Не би рекол дека распродажбите беа неверојатно драматични,  всушност, тие беа некако уредни. Но, сè уште постои таа неизвесност“.

Податоците покажаа дека довербата на потрошувачите се намалила на 103 од ревидираните 108,7 во август, што е под просечната проценка од 105,5 во анкетата на „Блумберг“ меѓу економистите. Одделни извештаи, исто така, покажаа дека купувањата на нови домови паднаа на најниско ниво во последните пет месеци, додека цените на куќите во САД се зголемија на рекордно високо ниво во текот на летото, а купувачите се бореа за прилично ниската понуда на пазарот.

Кварталниот извештај на „Костко“ (Costco Wholesale Corp.) покажа дека продажбите главно ги следат проценките на аналитичарите кои сугерираа дека купувачите го намалуваат своето дискрециско трошење.

„Додека Банката на федерални резерви е фокусирана главно на основата, просечниот потрошувач троши значителен дел од својот буџет на храна и енергија и не е подготвен да ги игнорира тие цени“, напиша Стивен Стенли, главен американски економист во „Сантандер“.

Приносите на благајничките записи се вратија нагоре откако во понеделникот  достигнаа децениски рекорди. На аукција, двегодишни обврзници вредни 48 милијарди американски долари беа запишани со камата 5,085 проценти, што е највисоко ниво од 2006 година. Индексот на доларот на „Блумберг“ напредуваше, поставувајќи нов врв во 2023 година во своето најсилно затворање од почетокот на декември. Нафтата го продолжи искачувањето, враќајќи се над границата од 90 долари за барел.

Технолошките гиганти како „Епл“ (Apple Inc.), „Мајкрософт“ (Microsoft Corp.), „Амазон“ (Amazon.com Inc.) и „Алфабет“ (Alphabet Inc.) ги повлекоа надолу индексите за американските акции, притискајќи го технолошкиот сектор надолу за повеќе од 10 проценти од јулскиот врв. Заканата од порестриктивна политика поништи дел од најголемите придобивки на пазарот оваа година кај растечките акции на технолошките компании. Со оглед на тоа што овие компании се ценат по нивните долгорочни изгледи за раст имаат помала привлечност бидејќи идните профити ќе бидат намалени под влијание на повисоките каматни стапки.

Повеќе претставници на Фед во изминатата недела порачаа дека ќе ја задржат политиката порестриктивна подолго ако економијата е посилна од очекуваното. Претседателот на Банката на федерални резерви на Минеаполис Нил Кашкари рече дека очекува американската централна банка да ги зголеми каматните стапки уште еднаш оваа година.

„Инвеститорите почнуваат да сфаќаат дека повисоки каматни стапки за подолг период е веројатен исход и полека се прилагодуваат на „новата нормала“, напиша во белешка Пол Нолте,  менаџер во „Марфи и Силвест Велт Менаџмент“. . „Повисоко-подолго е мантра на Фед веќе неколку месеци. Но, дури неодамна пазарите ги земаа на збор“.