Европските и американските берзи во зелено

Податоците за јулската инфлација во (САД), која беше малку пониска од еден месец претходно, ги поттурнаа акциите и берзанските индекси во средата нагоре, како во САД така и во Европа. Сепак, американската централна банка ФЕД предупредува дека сè уште е рано за оптимизам.

Европскиот индекс на најважните компании Eurostoxx 50 порасна за 0,91 отсто, парискиот индекс CAC 40 за 0,52 отсто, а франкфуртскиот DAX зајакна за 1,32 отсто.

Во однос на доларот еврото зајакна за 1,15 отсто, а ЕЦБ референтниот курс го одреди на 1,0252 долари. Нафтата благо падна, но и тексашката и северноморската нафта го завршија тргувањето над 90 долари.

Оптимизам на њујоршката берза

Податоците за инфлацијата, кои ги развеселија инвеститорите, ги покачија индексите. Dow Jones зајакна 535,10 поени за да заврши во плус од 1,63 отсто во однос на  вторникот, додека S&P 500 помина уште подобро, завршувајќи со добивка од 2,13 отсто на 4.210,24 поени. Закрепна и технолошкиот индекс Nasdaq, кој го затвори тргувањето на 12.854,80 поени, што е за 2,89 отсто повеќе од претходниот ден.

Посебна причина за оптимизам даде тргувањето на индексот S&P 500, кој денот на берзата го заврши со индекс повисок од најдоброто ниво во јуни, што е знак дека закрепнувањето може да биде долгорочно.

Падот на цената на горивата ја забави инфлацијата во САД

Но, некои високи претставници на ФЕД предупредуваат дека е рано за оптимизам и дека новите податоци за инфлацијата не значат дека ФЕД нема повторно да ги зголеми каматните стапки. 

„Не видов ништо во денешниот извештај што би го променило мојот поглед на актуелната ситуација“, изјави вчера за Bloomberg, Нил Кашкари, претседател на Банката на федерални резерви на Минеаполис. Кашкари очекува каматната стапка на ФЕД да порасне на 3,9 отсто до крајот на годината, а на 4,4 отсто до крајот на 2023 година, каде што би можела да остане долго време.

Во моментот, ФЕД е со каматна стапка од 2,5 отсто, а ново зголемување од најмалку 50 базични поени може да се очекува веќе во септември.

Во моментов нема коментари за веста. Биди прв да коментира...

Остави коментар