Вртоглави милијарди во вештачката интелигенција: Во кои акции вреди да се инвестира?

Технолошките гиганти како „Мета“ (Meta), „Мајкрософт“ (Microsoft), „Амазон“ (Amazon) и матичната компанија на „Гугл“ (Google), „Алфабет“ (Alphabet), планираат да одвојат 325 милијарди долари за развој на вештачката интелигенција (ВИ) во 2025 година, пресмета „Јаху фајнанс“ (Yahoo Finance). Тоа е зголемување за 46 отсто, од околу 223 милијарди долари што компаниите ги потрошиле минатата година.

Инвеститорите сега се прашуваат дали вреди да се обложуваат на акциите на овие компании што инвестираат милијарди во вештачка интелигенција.

 

 

Најголем раст на трошењето за вештачка интелигенција во апсолутна вредност направи е-трговецот „Амазон“, кој за годинава ќе одвои рекордни 105 милијарди долари. Тоа е за 34 отсто повеќе од лани. Поголемиот дел од овие пари ќе се потроши за развој на услугата во облак „Амазон веб сервис“ - АВС (Amazon Web Service - AWS). „Мајкрософт“ исто така значително ќе ги зголеми своите инвестиции во подобрување на инфраструктурата за вештачка интелигенција и проширување на мрежата на центрите за податоци годинава, планирајќи инвестиции од 80 милијарди долари, што е за 44 отсто повеќе од лани. Тие првенствено се фокусирани на интегрирање на ВИ во облакот „Азур“ (Azure) и зајакнување на нивното партнерство со „Опен еј-ај“ (OpenAI).

„Гугл“ исто така предвидува слично зголемување на инвестициите во ВИ, за 44 проценти, на 75 милијарди долари. Откако инвеститорите беа изненадени од инвестициите во ВИ за време на презентацијата на резултатите, извршниот директор на „Алфабет“, Сундар Пичаи, одговори со објава на Линкдин (LinkedIn), нагласувајќи дека инфраструктурата за ВИ е база за долгорочен раст. „Ние се движиме со одлично темпо - градиме, тестираме и лансираме производи побрзо од кога било“, напиша тој. Заедно со резултатите, тие го претставија и најновиот јазичен модел, „Џемини 2.0“ (Gemini 2.0).

 

 

„Мета“ ќе одвои 80 отсто повеќе средства за ВИ, што во апсолутна бројка изнесува 65 милијарди долари. Овој потег на „Мета“ позитивно ги изненади и инвеститорите, што се одрази на цената на акцијата. Акциите на „Мета“ постојано растат во последните 18 дена и го урнаа рекордот од 725 долари по акција. Само годинава тие се зголемени за 21 отсто.

Додека се поставуваат прашања за тоа кога ќе се исплатат инвестициите во ВИ на „Мајкрософт“ и „Алфабет“, инвестицијата на „Мета“ го промени начинот на целење и мерење на рекламите, што значи побрз раст и повисок просечен приход по корисник, изјави за „Блумберг“ Конрад ван Тиенховен, раководител за управување со портфолија во „Риверпарк капитал“ (Riverpark Capital). „Долго време ја гледам компанијата ’Мета’ како некоја што може да има најголема корист од ВИ покрај ’Енвидија’ (Nvidia) и мислам дека повеќе луѓе се согласуваат со тоа“, рече тој.

Да потсетиме дека акциите на „Мета“ добиваат на вредност и покрај турбуленциите предизвикани од поевтината верзија на ЧетГПТ (ChatGPT) во Кина, Дипсик (DeepSeek), која направи хаос на почетокот на февруари и предизвика голема распродажба на технолошките акции. Инвеститорите го доживеаја успехот на Дипсик како валидација на моделите со отворен код како тие што ги користи „Лама“ (Llama) на „Мета“, процени „Блумберг“. Марк Закерберг, првиот човек на „Мета“, дополнително ја подгреа возбудата за ВИ кога рече дека 2025 година ќе биде навистина голема година за вештачката интелигенција.

 

 

Милијарди ќе се соберат во „Енвидија“

Инвестициите од милијарди долари на технолошките гиганти во вештачката интелигенција на крајот ќе завршат кај „Енвидија“ и „Тајван семикондактр“ -ТСМК (Taiwan Semiconductor Manufacturing Company - TSMC) - двата водечки производители на паметни чипови, смета Михаел Блажековиќ, аналитичар во „Блумберг Адрија“.

„Енвидија“ ги надмина очекувањата на инвеститорите во последните осум квартали, а очекуваната заработка само се зголемува. Одлуката да се користат нови типови паметни чипови веројатно ќе ги просветли инвеститорите што вложуваат во „Енвидија“. „Најдобар доказ е дека акциите се тргуваат со 30 пати поголема од очекуваната заработка за 2026 година. Во моментов, оваа вредност е 51 пат поголема, додека стапката на раст на долгорочниот профит на ’Енвидија’ е дури 35 проценти“, тврди Блажековиќ.

Како ќе се движи цената на акциите на „Енвидија“ во наредните месеци во голема мера ќе зависи од политиката на Доналд Трамп и Илон Маск. Маск неодамна покажа интерес за преземање на „Опен еј-ај“, кој работи на ЧетГПТ, но Сем Алтман, со кого исто така има спор, јасно и гласно ја отфрли идејата: „’Опен еј-ај’ не е на продажба“.

Зошто инвеститорите се двоумат?

Дури и во услови кога технолошките гиганти инвестираат милијарди во ВИ, инвеститорите се прашуваат како ќе генерираат приходи од тоа. „Јаху фајнанс“, на пример, го разбра и го резимира одговорот на „Мета“ како: „Трошете сега, грижете се за последиците подоцна“.

Финансиската директорка на Мета, Сузан Ли, по објавувањето на деловните резултати изјави дека фокусот на компанијата на ВИ е насочен на создавање одлично искуство за потрошувачите. „Мислам дека со текот на времето ќе има доста јасни можности за монетизација овде“, рече таа.

„Амазон“ не ги открива приходите генерирани од ВИ. „Гугл“ исто така е таинствен, истакнувајќи дека генерирале милијарди годишен приход од инфраструктурата за ВИ и генеративните решенија за вештачка интелигенција, но не дава конкретни бројки. „Мајкрософт“ во својот последен квартален извештај забележа дека само вештачката интелигенција придонела со 13 процентни поени раст на приходите на „Азур“.

Препорака: Купи

И покрај предизвиците што ги носи вештачката интелигенција, аналитичарите во голема мера се биковски расположени кога станува збор за акциите на технолошките гиганти. Ако ги погледнеме препораките на аналитичарите на терминалот на „Блумберг“, може да се заклучи дека над 90 отсто од нив се за купување акции на „Мајкрософт“ и „Амазон“, близу 90 отсто се за купување акции на „Мета“ и „Енвидија“, 78 отсто од аналитичарите би се одлучиле за „Алфабет“ и 60 отсто од нив се за „Епл“ (Apple). „Тесла“ (Tesla) има најмалку препораки за купување, „само“ 50 проценти од аналитичарите го препорачуваат тоа. Акциите на „Тесла“ паднаа за повеќе од една третина од својот врв постигнат на крајот на минатата година, а  за тоа има неколку причини - од политичкото ангажирање на Илон Маск до значителниот пад на продажбата на „Тесла“.

Блажековиќ е сличен оптимист, кој смета дека годинава може да биде победничка за големите американски технолошки компании поради комбинацијата на прогнозите за инвестиции и политиката на Трамп.

 

Европа со 200 милијарди вештачка интелигенција: „Повторно доцни“ Претседателката на Европската комисија, Урсула фон дер Лајен, на Самитот за вештачка интелигенција во Париз ја почна иницијативата „Инвест еј-ај“ (InvestAI) за мобилизирање 200 милијарди евра за инвестиции во вештачка интелигенција, вклучувајќи и формирање нов европски фонд од 20 милијарди евра за гигантските фабрики за вештачка интелигенција. The AI race is just beginning. Building on the European AI Champions initiative, I’m glad to announce InvestAI 🇪🇺 We aim to mobilise €200 billion in AI investments in Europe ↓ https://t.co/PaLTUDsVpm — Ursula von der Leyen (@vonderleyen) February 11, 2025   „Сето ова изгледа бавно и одложено во споредба со САД“, коментира аналитичарот на „Блумберг Адрија“ Михаел Блажековиќ. „Ситуацијата е под знак прашалник за европската висока напредна технологија (ретки се тие што може да се сметаат за такви во Европа). Регулативата, недостигот од раст во западните економии, големата зависност од кинеската економија и слабото евро се главните причини зошто не гледаме европските технолошки акции да постигнуваат значителни резултати годинава“, вели песимистички Блажековиќ.