Царинските акробации на Трамп ги држат берзанските аналитичари во неизвесност

Нестабилниот пазар на акции ги принудува водечките аналитичари на Волстрит на драстични промени во прогнозите.

Минатиот месец стратезите за продажба масовно ги намалија своите прогнози за индексот S&P 500 додека претседателот Доналд Трамп воведуваше царини низ светот, што предизвика бран на продажба на акции. Меѓутоа, неговата администрација во меѓувреме го смени правецот и ги ублажи најстрогите планови за трговски мерки – последно во низата беше привременото меѓусебно намалување на царините со Кина – што ги натера истите тие стратези целосно да ги ревидираат своите предвидувања.

„Беше навистина бурно“, рече Ед Јардени, ветеран од Волстрит и основач на „Јардени рисрч“ (Yardeni Research). „Обично ретко ги менувам моите прогнози. Овој пат им реков на клиентите дека го задржувам правото да ја менувам прогнозата толку често колку што претседателот го менува мислењето“.

Вообичаено е стратезите ретко да ги коригираат своите прогнози, бидејќи тие се базираат на различни модели што го предвидуваат ефектот на референтниот индекс. Но под водство на Трамп, предлозите за политики и најавите на планови може да се сменат или целосно да се свртат штом тој даде изјава или напише нешто на социјалните мрежи. Поради тоа, овие промени станаа неопходни и многу почести од порано.

Bloomberg

 

Јардени и Дејвид Костин од „Голдман Сакс“ (Goldman Sachs Group Inc.) се меѓу стратезите што неделава го сменија правецот, предвидувајќи дека S&P 500 ќе порасне над 6.000 до крајот на декември. И двајцата, сепак, беа меѓу првите што во април, за време на пазарниот пад предизвикан од најавите на Трамп за царини, остро ги намалија своите прогнози за овој референтен индекс за 2025 година. Тогаш прогнозите се намалуваа со најбрзо темпо уште од пазарниот колапс за време на пандемијата во март 2020 година.

Промена на правецот

Сега оптимизмот се враќа на берзата, бидејќи глобалната трговска војна што ја води Трамп почнува да се смирува. Во понеделникот Јардени ја зголеми својата прогноза за крајот на годината на 6.500 поени, од претходните 6.000. Претходно, двапати за помалку од еден месец ја намали својата процена, откако царините на Трамп го зголемија ризикот од рецесија. Тој верува дека финансиските пазари го принудиле претседателот да направи чекор назад.

Во „Голдман Сакс“, тимот предводен од Костин, главниот стратег за американскиот пазар на акции, ја зголеми целната вредност за крајот на годината на 6.100 поени, наведувајќи ги како причини пониските царини, подобриот економски раст и помалиот ризик од рецесија отколку што очекувале. Оваа промена следуваше откако банката двапати годинава ја намалуваше процената, за потоа во петокот, по затворањето на пазарот, да ја зголеми на 5.900.

Овие чести пресврти истакнуваат колку е тешко да се предвиди движењето на пазарот кога тој се обликува според изјавите и политичките одлуки на Трамп. И додека американскиот пазар на акции го слави напредокот во трговските преговори, економистите предупредуваат дека негативните ефекти од царините врз довербата на бизнисите и потрошувачите сè уште не се појавиле во економските индикатори, но би можеле да се појават во месеците што следуваат.

Инвеститорите на берзата засега уживаат во позитивните движења. Во вторникот индексот S&P 500 ги избриша сите загуби од годинава, кои на 8 април достигнаа 15 проценти, додека Волстрит го поздрави напредокот во преговорите помеѓу Белата куќа и Пекинг. Намалената инфлација дополнително го поттикна оптимизмот на пазарот.

„Целните вредности на индексите често се сфаќаат премногу буквално“, рече Мајкл О’Рурк, главен пазарен стратег во компанијата ЏТ (JonesTrading). „Јасно е дека никој нема увид во тоа како размислува претседателот, а со оглед на неговите чести пресврти од 180 степени, опасно е да се прават прогнози засновани на неговата политика“.

Во моментов нема коментари за веста. Биди прв да коментира...

Остави коментар