Ковид букна во Азија, букнаа и акциите на производителите на тестови и вакцини

Акциите на производителите на комплети за тестирање и лекови за ковид во Азија пораснаа по порастот на случаи. Јужнокорејскиот производител на комплети за дијагностика „Сугентек Инк.“ ( Sugentech Inc.) беше меѓу најдобрите со скок на акциите од дури 29 проценти во понеделникот. Во Јапонија, акциите на производителот на вакцини за ковид „Даичи Санкио“ (Daiichi Sankyo) пораснаа за дури 7,4 проценти откако нивната целна цена беше зголемена од „УБС“. Во Хонг Конг, акциите на „Шангај Џунши Биосајенс Ко.“ (Shanghai Junshi Biosciences Co), која исто така произведува вакцини за Ковид, пораснаа за дури 4,3 проценти.

Здравствените власти во густо населениот Хонг Конг и Сингапур предупредија дека случаите на ковид-19 се зголемуваат откако нов бран од вирусот почна да се шири низ Азија. Кина е на добар пат да види бран на ковид што ќе го достигне летниот врв од минатата година, според податоците од Кинескиот центар за контрола и превенција на болести.

„По враќањето во нормала, Хонг Конг доживеа циклуси на активни периоди на ковид-19 на секои шест до девет месеци“, рече Едвин Цуи, контролор на Центарот за здравствена заштита на Хонг Конг. „Очекуваме нивото на активност на ковид-19 да остане на повисоко ниво барем во следните неколку недели.“

Корејската агенција за контрола и превенција на болести минатиот месец го продолжи својот сезонски период на вакцинација против ковид за два месеци до крајот на јуни, советувајќи ги луѓето на возраст од 65 години и повеќе, повеќето имунокомпромитирани лица, болничките пациенти и оние во установите да се вакцинираат со вакцината ЈН1 од „Фајзер“ (Pfizer Inc.) и од „Бионтек“ (BioNTech SE).

„Ковид-19 се јавува сè повеќе не само во зима, туку и во лето во последните три години, па затоа се препорачува да се вакцинираат што е можно поскоро за да се овозможи доволен период на имунитет“, се вели во соопштението на КДЦА (KDCA).

Акциите на корејските производители на комплети за тестирање за ковид, вклучувајќи ги „Хјумасис“ (Humasis Co.), „ЛабЏеномикс“ (LabGenomics Co.), „Сииџен“ (Seegene Inc.) и „СД Биосенсор“ (SD Biosensor Inc.), пораснаа во понеделникот. Акциите на производителот на вакцини за ковид, „СК Биосајанс“ (SK Bioscience Co.), скокнаа за дури 7,2 проценти.

„Во корејскиот фармацевтски простор со мала капитализација, малопродажните текови остануваат доминантни“, рече Гари Тан, менаџер за портфолио во „Олспринг глобал инветсментс“ (Allspring Global Investments) во Сингапур. „Малопродажните инвеститори може опортунистички да се позиционираат во одредени имиња во секторот.“

— Со помош од Амбер Тонг