Банките од Волстрит се свртеа кон пазарите во развој: завршија лошите години

Оние инвеститори на Волстрит што им веруваат на пазарите во развој конечно забележуваат подобри приноси по годините на пропуштени можности додека американските акции растеа до небо.

„Морган Стенли инвестмент менаџмент“ (Morgan Stanley Investment Management), „АКР Капитал менаџмент“ (AQR Capital Management), Банката на Америка (Bank of America Corp.) и „Франклин Темплтон“ (Franklin Templeton) се меѓу оние што се обложуваат дека ситуацијата конечно се врти во корист на акциите од пазарите во развој.

Мајкл Хартнет од Банката на Америка ги нарекува „следниот биков пазар“. АКР предвидува дека тие ќе донесат годишни приноси во локална валута од речиси 6 отсто во следните пет до десет години, надминувајќи го растот од 4 отсто за американските акции во долари.

И покрај неодамнешното закрепнување на S&P 500, индексот беше непроменет од почетокот на годината до затворањето во петокот, додека еквивалентниот индекс за пазарите во развој порасна за 10 отсто. Овој раст разгорува надежи дека деценијата и половина на неисполнети ветувања - во кои американскиот референтен индекс порасна за повеќе од 400 отсто наспроти скромните 7 отсто за акциите од земјите во развој - можеби се ближи кон крајот.

Меѓу причините се: слабеењето на доларот, нестабилноста на S&P и прашањата за статусот на американските државни обврзници како сигурно засолниште, што ги тера инвеститорите сè повеќе да гледаат надвор од САД додека трговската војна на претседателот Доналд Трамп зема замав. Загриженоста за растечкиот долг и дефицит, што во петокот ја натера агенцијата „Мудис“ да го намали кредитниот рејтинг на САД, само долева масло на огнот.  

Некои инвеститори што бараат алтернативи на американскиот пазар се свртеа кон јапонскиот јен, германските обврзници и еврото, но оние подготвени да прифатат малку повеќе ризик го преиспитуваат обичајот да повлекуваат пари од пазарите во развој и да ги вложуваат во САД во моменти на стрес.

„Ризикот од депрецијација на американскиот долар е сигнал за будење за инвеститорите“, рече Кристи Тан, инвестициски стратег во „Франклин Темплтон“, која ги претставува долговите на земјите во развој како алтернатива на американските државни обврзници. „Сметаме дека американската исклучителност засега е завршена“.

Bloomberg Mercury

 

Четиримесечниот пад на доларот до април значи дека приносите во локална валута споменати од АКР добиваат дополнителен поттик кога се конвертираат назад во долари. Референтниот индекс на валути од пазарите во развој на МСЦИ (MSCI Inc) достигна рекорд на почетокот на мај откако порасна за околу 5 отсто годинава.

„Конечно, сега го имаме катализаторот“, рече Џитанија Кандари, заменик-главна инвестициска директорка во „Морган Стенли инвестмент менаџмент“, која уште пред две години прогласи дека ерата на пазарите во развoj пристигна кога се префрли од американски на акции кон пазарите во развој.

Овој пат е посигурна: врз основа на историските просеци, слабеењето на доларот може да придонесе за една третина од приносите на акциите од пазарите во развој, вели таа. Откако нејзините инвестиции не успеаја да ја следат стапката на принос на американскиот пазар на акции во изминатите две години, нејзиниот фонд оствари принос од 17 отсто годинава, надминувајќи 97 отсто од конкурентите, според податоците собрани од „Блумберг“.

Намалувањето на рејтингот од „Мудис“ ги притисна фјучерсите на американските акции и доларот во понеделникот, додека кривата на приносите на државните обврзници се заостри. Акциите од пазарите во развој паднаа за 0,4 отсто.

Товарот на долговите

Сега Кандари истражува подлабоко, барајќи акции во банкарството, електрификацијата, здравството и одбраната што се изложени на локалната побарувачка, а со тоа се помалку ранливи на повисоките царини. Во АКР извршниот директор Крис Доени го насочува вниманието кон компании од пазарите во развој со помала капитализација, за кои предвидува дека ќе имаат добри резултати на среден до долг рок.

Приливот на пари  во американските ЕТФ-ови што инвестираат во пазарите во развој, како и оние насочени кон одредени земји, изнесуваше 1,84 милијарда долари во неделата што заврши на 9 мај, повеќе од двојно во однос на претходната недела, според податоците собрани од „Блумберг“.

Секако, пазарните пресврти, политичките превирања и локалните кризи се вградена карактеристика на класата на средства од пазарите во развoj и годинашните добивки сè уште можат да потфрлат. Непостојаниот раст на заработката во некои земји во развој во споредба со САД и другите развиени пазари, заедно со трансакциските трошоци, исто така обесхрабрува некои инвеститори.

„Од една страна, БДП на пазарите во развој расте побрзо од развиените пазари, но вистинскиот проблем е непостојаниот раст на заработката“, рече Мајкл Бејли, директор за истражување во „Фултон Брејкфилд Брениман“ (Fulton Breakefield Broenniman).

„Еден долгорочен пример е Кина, каде што економијата расте брзо, но често кинеските компании издаваат толку многу акции што растот на заработката разочарува во споредба со САД и другите развиени пазари“, рече тој. „Индија е уште еден привлечен пазар во развој во теорија, но може да биде тешко достапен поради високите трансакциски трошоци, а долгорочните приноси се слични на S&P 500“.

Досега префрлањето од американски акции кон пазарите во развој не се гледа во поширокиот осврт за капиталните текови, додека апетитот за европските средства е присутен, според Габриела Сантос, главен пазарен стратег за Америка во „ЏП Морган асет менаџмент“ (JPMorgan Asset Management).

Но, ако доларот продолжи да слабее, „тогаш тој втор чекор може позитивно да се прелее врз пазарите во развој“, рече таа.

Во споредба со некои од поголемите пазари во развој, САД изгледаат ограничено во однос на тоа што може да направат за да ја зајакнат економијата додека нивниот долг се приближува до 30 илјади милијарди долари. Земји како Индија и Филипините веќе дејствуваа брзо со агресивни намалувања на каматните стапки, додека Федералните резерви се внимателни да не попуштаат премногу агресивно за да не ја разгорат повторно инфлацијата.

„Фундаментите на главните пазари во развој се цврсти, карактеризирани со низок надворешен долг и поволни соодноси на долг кон БДП“, рече Тан од „Франклин Темплтон“, наведувајќи ги Турција, Саудиска Арабија, Јужна Кореја и неколку азиски земји.

„Овој профил на низок долг е значајна привлечност, особено во споредба со САД“.

 

-Со помош на Зиџија Сонг и Метју Грифин