Се исплати ли сѐ уште да се вложува во „Енвидија“?

Компанијата „Енвидија“ (Nvidia) денес по затворањето на берзите ќе ги објави деловните резултати за првото фискално тримесечје – една од најочекуваните објави сезонава. Според „Блумберг“, акциите на „Енвидија“ – компанија со пазарна капитализација поголема од 3.200 милијарди долари – инвеститорите често ги гледаат како водечки индикатор за побарувачката за вештачка интелигенција.

Иако акциите на „Енвидија“ во последните седум недели пораснаа за околу 40 отсто, тие и понатаму се приближно 14 отсто под рекордното ниво од јануари. Со моментален коефициент цена-добивка (P/E) од околу 28, вреднувањето на компанијата е под петгодишниот просек од 40, покажуваат податоците на „Блумберг“. Во вторникот, акцијата затвори на 135,50 долари.

Според аналитичарите од ББВА, силни деловни резултати на „Енвидија“ би можеле да предизвикаат нов бран раст на американските берзи, имајќи предвид дека инвеститорите во моментот имаат приближно 7.000 милијарди долари распределени во парични фондови. Според техничката анализа на „Инвестопедија“ (Investopedia), трендот е позитивен и во полза на биковските позиции пред денешната објава на резултатите.

Очекувани резултати

Аналитичарите предвидуваат дека „Енвидија“ ќе прикаже раст на приходите од 66 отсто и раст на добивката од 40 отсто за последното тримесечје. Според податоците собрани од „Блумберг“, се очекува приспособена добивка по акција (EPS) од 0,88 долари и приходи од 43,3 милијарди долари. Во истиот период лани компанијата оствари 0,61 долар EPS и 26 милијарди долари приходи.

Според деловните сегменти, се очекува приходите од податочни центри да достигнат 39,2 милијарди долари, што претставува раст од 74 отсто на годишно ниво. Во однос на региони, се проценува дека приходите од Кина ќе достигнат 6,2 милијарди долари или раст од 150 отсто споредено со истиот квартал лани. Во САД приходите би требало да изнесуваат 21,6 милијарди долари.

Загуби поради забраната на чипот H20

Во април „Енвидија“ објави дека поради забраната за продажба на нејзиниот чип H20 во Кина – воведена од администрацијата на Трамп – ќе мора да отпише 5,5 милијарди долари. Некои процени велат дека загубата достигнува дури осум милијарди долари.

„Инвеститорите се загрижени дека прогнозата за приходите за кварталот што завршува во јули ќе биде под очекувањата“, напиша Џордан Клајн, аналитичар во „Мизухо секјуритис“ (Mizuho Securities).

Според Џозеф Мур од „Морган Стенли“ (Morgan Stanley), побарувачката за новите чипови „блеквел“ (Blackwell) е силна, но ограничените производствени капацитети оневозможуваат целосна компензација на загубите од забраната на H20, пренесе „Јаху фајненс“ (Yahoo Finance).

Според „Ројтерс“ (Reuters), „Енвидија“ веќе развива приспособена верзија на чипот H20 што ќе ги задоволи новите регулаторни ограничувања.

Блискиот Исток како нова можност

Акциите на „Енвидија“ дополнително зајакнаа откако компанијата објави дека во следните пет години ќе ѝ испорача стотици илјади графички процесори на компанијата „Хјумеин“ (Humain), која е поддржана од државниот инвестициски фонд на Саудиска Арабија.

Оваа вест беше објавена за време на посетата на Доналд Трамп на Блискиот Исток, каде што беше најавен и вториот проект „Старгејт“ (Stargate) во Обединетите Арапски Емирати, кој ќе се заснова на системите „Блеквел“, пишува „Јаху фајненс“.

Според магазинoт „Форчн“ (Fortune), целта на ова партнерство е изградба на податочен центар за вештачка интелигенција со капацитет од 500 мегавати – клучен чекор во рамките на програмата „Визија 2030“ на Саудиска Арабија, со која земјата сака да ја диверзифицира економијата и да инвестира во напредна технологија.

Извршниот директор на „Енвидија“, Џенсен Хуанг, ја пофали долгорочната визија на Саудиска Арабија. „Ова е навистина извонредна визија“, изјави тој за планот за создавање национална инфраструктура за вештачка интелигенција, пренесе „Си-ен-би-си“ (CNBC).

Податочните центри  на „Хјумеин“, кои ќе ги користат тие чипови, ќе хостираат големи јазични модели (LLM) на арапски јазик и мултимодални ВИ-алатки способни за обработка на говор, слики и текст. Според „Ројтерс“, целта е развој на регионално адаптирани модели што ќе ја поддржат инфраструктурата на паметни градови, автономна логистика и одбранбени технологии.

Очекувања од аналитичарите

„Енвидија“ е една од најследените акции од аналитичарите. Според податоци од терминалот на „Блумберг“, над 80 отсто од аналитичарите препорачуваат купување на акцијата. Просечната 12-месечна целна цена е 161 долар по акција, што е за околу 20 отсто повисоко од сегашното ниво.

Анализата на опциите покажува дека пазарот очекува поместување на цената на акцијата во следните неколку дена од околу 6 отсто, во која било насока. Тоа би значело движење помеѓу 143,92 долари (највисока вредност во последните четири месеци) и 127,09 долари (над нивото по договорот меѓу САД и Кина за намалување на царините).

Иако „Енвидија“ од мај 2024 година ги надминува аналитичките очекувања секое тримесечје, акцијата не секогаш го одразува тоа. По последните три објави, цената на акцијата падна – во февруари годинава за речиси 9 отсто, и покрај тоа што резултатите ја потврдија силната побарувачка за чипови за вештачка интелигенција, потсетува „Инвестопедија“.