text size
„Енвидија“ (Nvidia Corp.), производителот на чипови во средиштето на бумот на вештачката интелигенција, даде оптимистичка прогноза за продажбата за фискалната 2028 година, намалувајќи ја загриженоста дека трошењето за ВИ би можело да го загуби моментумот.
Покрај тоа, „Енвидија“ би растела уште побрзо доколку има пристап до повеќе залихи, рече таа. „Неверојатно е што дури и со нашиот обем забележуваме забрзување на побарувачката“, рече Крес. „Прогнозите на клиентите укажуваат дека нашиот раст следната година ќе се удвои.“
Bloomberg
Оптимистичката прогноза им донесе олеснување на инвеститорите загрижени поради можен балон во економијата на ВИ. „Енвидија“, највредната компанија во светот, е водечки снабдувач на акцелератори за ВИ, клучна компонента за обучување и работа на моделите на вештачка интелигенција. Таквиот статус ги претвори нејзините квартални резултати во показател за состојбата на пошироката индустрија.
Акциите на компанијата пораснаа за повеќе од четири отсто во продолженото тргување по изјавите на Крес.
Во извештајот за резултатите на „Енвидија“ за вториот квартал, извршниот директор Џенсен Хуанг изјави дека побарувачката само забрзува. Тој го истакна и пуштањето во употреба на најновата линија чипови на компанијата, Вера Рубин.
„Изградбата на инфраструктурата за ВИ се одвива со полна пареа“, рече тој. „Вера Рубин, која сега е во целосно производство, беше создадена да го придвижува токму овој момент.“
Приходите во тековниот период ќе изнесуваат 108 милијарди долари, плус или минус два отсто, соопшти компанијата. Аналитичарите во просек проценуваа 105,2 милијарди долари. Бруто-маржата, процентот од продажбата што останува по одземањето на трошоците за производство, ќе изнесува приближно 74 отсто во кварталот.
Компанијата предупреди дека маржите ќе се намалат во наредните месеци, додека „Енвидија“ се справува со наглиот раст на трошоците за меморија. Компанијата очекува овој показател да го достигне најниското ниво во четвртиот фискален квартал - период што трае до јануари - на 71 до 72 отсто.
Како што „Енвидија“ ги зголемува сопствените цени, маржата би требало да се стабилизира на 72 до 73 отсто во фискалната 2028 година, рече Крес.
„Енвидија“ предвидува дека маржите ќе се намалат
Извор: Company data compiled by Bloomberg
Пошироката порака беше дека нема никакво намалување на побарувачката од клиентите. По неколку години неконтролиран раст, некои инвеститори почнаа да стравуваат од потенцијален балон. Многубројните инвестициски договори на „Енвидија“ со компании од економијата на ВИ, исто така, предизвикаа стравувања дека кружните зделки ќе ја остават индустријата на понестабилни темели.
„Би сакале да имаме поголема понуда“, рече Крес во интервју. „Навистина се сведува на тоа колку повеќе би можеле да направите.“
Во вториот квартал, кој заврши на 26 јули, продажбата се зголеми повеќе од двојно во однос на претходната година, на 96,2 милијарди долари. Добивката изнесуваше 2,22 долари по акција, без одредени ставки. Аналитичарите прогнозираа приходи од 92,5 милијарди долари и добивка од 2,09 долари по акција.
Клучниот оддел на „Енвидија“ за дата-центри оствари приходи од 89 милијарди долари, во споредба со просечната процена од 85,8 милијарди долари. Група компании познати како хиперскалери, во која се вклучени „Амазон“ (Amazon.com Inc.) и „Гугл“ на „Алфабет“ (Alphabet Inc.), имаше голем удел во таа продажба.
„Енвидија“ настојува да ја прошири базата на клиенти, со цел да покаже дека за голем дел од продажбата е помалку зависна од мала група технолошки гиганти.
Инвеститорите, во меѓувреме, стануваат сѐ потешки за импресионирање. „Енвидија“ сега веќе 16 квартали по ред остварува продажба над процените на Волстрит. Но, тоа не секогаш им помагаше на нејзините акции, бидејќи акционерите почнаа да ги земаат нејзиниот брз раст и подобрите резултати од очекуваните здраво за готово. Акцијата падна ден по објавувањето на пет од последните шест извештаи за резултатите.
Единствените компании во индустријата на полупроводници што можат да се споредат со растот на приходите на „Енвидија“ се производителите на мемориски чипови: „Самсунг електроникс“ (Samsung Electronics Co.), „СК Хајникс“ (SK Hynix Inc.) и „Мајкрон технолоџи“ (Micron Technology Inc.). Обучувањето и работата на софтверот за ВИ бараат огромна количина компјутерска меморија, што го поттикна растот, но истовремено создаде и огромен притисок врз нивните фабрики. Иако го прошируваат капацитетот, компаниите не очекуваат да ја достигнат побарувачката уште со години. Недостигот предизвика силен раст на цените на мемориските чипови.
„Енвидија“ предвидува уште една година на огромен раст
Извор: Company data compiled by Bloomberg
Недостигот ја засега и „Енвидија“, бидејќи меморијата е вградена во пакет со нејзините чипови. Компанијата ги извести клиентите дека ги зголемува цените на производите за да ги надомести растечките трошоци.
Истовремено, голем број потенцијални конкуренти се насочуваат кон профитабилниот пазар на „Енвидија“. И самите клиенти на компанијата сѐ повеќе развиваат сопствени чипови, што долгорочно би можело да ја намали нивната зависност од „Енвидија“.
Само оваа недела, производителот на ЧетГПТ, „Опен еј-ај“ (OpenAI), соопшти дека неговиот нов процесор Џалапено постигнал подобри резултати од актуелната линија на „Енвидија“ за време на тестирањето.
„Енвидија“ помина голем дел од изминатата година договарајќи инвестициски зделки со големи компании за ВИ, вклучувајќи развивачи на софтвер и на инфраструктурата што го поддржува. Тие договори - и ветената финансиска поддршка - теоретски ја обврзаа „Енвидија“ на десетици милијарди долари обврски.
Компанијата соопшти дека таквите договори ќе го забрзаат усвојувањето на ВИ, што ќе создаде уште поголема побарувачка за нејзините производи. Но, критичарите изразија загриженост дека кружното финансирање ќе поттикне вештачка побарувачка.
Крес ги опиша договорите како дел од напорите на „Енвидија“ да ја зголеми понудата. Најголемиот дел од нејзините преземени обврски за трошење бил во форма на долгорочни договори за набавка со добавувачите, рече таа.
„Најголемиот дел од она за што им помагавме на другите во поглед на преземените обврски е една многу важна работа наречена понуда“, рече Крес.
Компанијата и натаму се бори за поголем пристап до најголемиот светски пазар за полупроводници - Кина. Вашингтон ѝ дозволи во ограничен обем да продава дел од своите чипови за ВИ во земјата, но Пекинг го забави процесот со строга контрола врз купувањата.
За компанијата - и за нејзините инвеститори - зацврстувањето на позицијата во Кина се смета и за пат кон раст и за начин да се спречи домашните кинески производители на чипови да станат премногу моќни.
.webp){kind=icon}
