Основачот на хеџ-фонд Џона Ченг ја нарече „Енвидија“ најдобриот потег во својата кариера. Но сега ги продаде и последните акции од таа компанија, бидејќи се сомнева во иднината на производителот на чипови чија пазарна вредност изнесува 3,5 трилиони долари.
Поранешниот аналитичар на УБС (UBS), чиј технолошки ориентиран фонд минатата година оствари принос од 42 процента, беше меѓу инвеститорите кои со години го следеа вртоглавиот раст на „Енвидија“. Тоа беше една од првите акции што ги купил кога во 2016 година го основа фондот ЦГФ (Captain Global Fund), и повеќепати повторно инвестирал во неа. Но сега веќе не е толку сигурен.
Ченг ги продаде своите акции од „Енвидија“ во првиот квартал поради загриженост околу доцнењето поврзано со нивниот производ ГБ200 (GB200). Како причини за претпазливост ги навел ризиците поврзани со резервите, недостатокот на позитивни корекции на прогнозите за добивка, конкуренцијата од чипови по нарачка, како и пошироки прашања за темпото на трошење на компаниите во областа на технологиите во облак.
„Навистина ја сакам 'Енвидија', тоа е акцијата со која сум заработил најмногу во животот,“ изјави Ченг, чиј фонд управува со околу 100 милиони долари средства. „Но кога морам да продадам – морам да продадам. Не смееш да се заљубиш во акција“.
Акциите на таа компанија пораснаа за повеќе од 1.400 проценти во последните пет години, а аналитичарите сè уште имаат високи очекувања. Сепак, се појавуваат скептици. Компанијата СГС (Seaport Global Securities) на 30 април издаде ретка препорака за продажба на акциите и предупреди на можен пад на буџетите за вештачка интелигенција во 2026 година. Мајкл Бари, познат по облогот против американскиот пазар на недвижности, на почетокот од годината вложи во „мечкини“ опции за „Енвидија“, иако е можно тоа да било само заштита од ризик.
И покрај тоа, тешко е да се обложиш против овој производител на чипови од Калифорнија. Иако „Енвидија“ во првиот квартал забележа пад, како последица на изненадувачкиот напредок на кинеската компанија „Дипсик“ (DeepSeek), што ги потресе технолошките акции, сега ги надомести сите загуби и годинава, заклучно со минатиот петок, е во плус од околу шест проценти. Во тоа помогнаа и знаците на смирување на односите меѓу Кина и САД, со што се ублажи еден од најголемите предизвици за светските производители на чипови.
Ченг, кој пред сегашната функција беше аналитичар за секторот на чипови во УБС, изјави дека не е долгорочен песимист за „Енвидија“. Повторни би купил акции ако компанијата ги подобри своите прогнози за добивка и тврди дека не зазел кратка позиција против „Енвидија“.
Кон крајот на 2024 година ги продаде и акциите на тајванската компанија ТСМЦ (TSMC), најголемиот светски производител на чипови. Како причини ги наведе геополитичките ризици и недостатокот на транспарентност во врска со инвестициските планови на давателите на услуги во облак.
Во моментов, тој преферира помали компании кои ги снабдуваат технолошките гиганти со опрема. Меѓу неговите најважни избори се производителите на сервери за ВИ „Селситика“ (Celestica) и „Вивјн“ (Wiwynn), производителот на опрема за ладење АВЦ (Asia Vital Components) и производителот на кабли „Кредо“ (Credo Technology Group).
.webp){kind=icon}
Во моментов нема коментари за веста. Биди прв да коментира...