Кети Вуд делумно излезе од криптофирма откако заработи многу за три недели

Кети Вуд го потскрати своето портфолио откако постигна голем успех со својот последен смел облог: „Сркл интернет груп“ (Circle Internet Group Inc.), фирмата за стабилни монети (англ. stablecoins) чии акции пораснаа за над 600 отсто од своето излегување на берза на почетокот на јуни.

Инвестициската фирма „Арк инвестмент менаџмент“ (Ark Investment Management) на Вуд продаде околу 1,5 милион акции на „Сркл“ во текот на четири скорашни трговски сесии, во вредност од околу 333 милиони долари, врз основа на пресметката што ја направи „Блумберг“ од дневните извештаи за тргување на фирмата.

Продажбата доаѓа само неколку недели откако три од фондовите на Вуд што се тргуваат на берза купија 4,5 милиони акции на „Сркл“, кои беа проценети на околу 373 милиони долари на затворањето на нивното деби за тргување на 5 јуни. Со огромниот раст на акциите од тогаш, „Арк“ веројатно си врати голем дел од своите почетни удели преку продажбата.

Водечкиот фонд во фирмата на Вуд, „АРК Иновејшн“ (ARK Innovation ETF) (тикер ARKK), со средства од 6,5 милијарди долари, продаде 1,2 милион акции. „АРК Некст џенерејшн интернет“ (ARK Next Generation Internet ETF - ARKW) и „АРК Финтек иновејшн“ (ARK Fintech Innovation ETF - ARKF) исто така продаваа акции. Фирмата на Вуд како целина останува осмиот најголем сопственик на „Сркл“, покажуваат податоците собрани од „Блумберг“.

„Остварувањето профит е природен дел од стратегијата на ‘Арк’“, рече Тод Сон, виш аналитичар за ЕТФ во „Стратегас рисрч“ (Strategas Research). „Поважните прашања и размислувања би се појавиле ако целосно се ослободат од тие акции; тоа би го зголемило ризикот од повторување на сценариото со ‘Енвидија’“.

Портпаролот на „Арк“ не одговори на барањето за коментар.

Ослободувањето од акции на „Сркл“ од страна на „Арк“ доаѓа откако акциите на компанијата што стои зад УСДЦ (USDC), втората најголема стабилна валута по пазарен удел, пораснаа за над 600 отсто откако започна тргувањето претходно месецов - што претставува всушност најуспешно деби на берза поврзано со криптовалути уште од времето на директното котирање на „Коинбејс глобал“ (Coinbase Global Inc.) во 2021 година. „Сркл“, со седиште во Њујорк, сега е проценета на околу 50 милијарди долари, што ја става во лигата на „тешкашите“ од типот на „Коинбејз“ и „Робинхуд маркетс“ (Robinhood Markets Inc.) Инаку, акциите на „Сркл“ паднаа дури за 16 отсто во вторникот.

Bloomberg Mercury

 

„’Арк’ ги удвои своите инвестиции за помалку од еден месец“, рече Атанасиос Псарофагис, аналитичар за ЕТФ во „Блумберг интелиџенс“. „Не е невообичаено тие да продаваат додека акциите растат“.

Во 2023 година Вуд се најде на насловните страници со затворањето на позицијата на „Арк“ во „Енвидија“ токму кога акциите растеа, поттикнати од глобалниот раст на цените поради оптимизмот околу вештачката интелигенција.

Портфолијата на „Арк“ во технолошки компании, како што се „Тесла“  и „Роблокс“, закрепнаа од падот предизвикан од нестабилноста на царините, заедно со поширокиот берзански пазар, бидејќи претседателот Доналд Трамп се повлече од некои од неговите најекстремни трговски предлози.

Од април сите три ЕТФ-ови на „Арк“ го надминаа индексот S&P 500 за најмалку шест пати. Додека ултраоптимистичкиот став на Вуд кон компанијата за електрични возила на Илон Маск останува под знак прашалник за некои - со оглед на нејзиното очекување дека акциите ќе достигнат 2.600 долари за пет години - „Тесла“ го надмина S&P 500 за повеќе од трипати во истиот период. „Тесла“ е најголемиот посед на „Арк“.

И покрај растот на фондовите на Вуд годинава, ентузијазмот кај нејзината армија мали вложувачи исчезна, што е далеку од нејзината популарност за време на пандемијата во 2021 година, кога месечните приливи од повеќе милијарди долари не беа невообичаени.

ARKK е на добар пат за седми последователни неделни одливи досега годинава, покажуваат податоците собрани од „Блумберг“, додека ARKW и ARKF забележаа флуктуации на тековите.