Паѓаат рекорди: Да, во долари, но не и во евра

Индексот на страв и алчност што го објавува „Си-ен-ен“ (CNN) повторно покажува прекумерна алчност на инвеститорите. Американскиот S&P 500 се приближува до рекордното ниво од 6.280 поени, а расположението на пазарот станува сѐ побиковско – особено кај инвеститорите што заработуваат во долари.

Но, за Европејците приказната е поинаква. Иако S&P 500 годинава донесе принос од 6,5 отсто во долари, поради посилното евро, реалниот поврат за европските инвеститори е негативен:  -6,4 отсто. Од почетокот на годината еврото зајакна за речиси 15 отсто во однос на доларот.

Анaлитичарите на „Морган Стенли“ (Morgan Stanley) прогнозираат дека доларот ќе продолжи да слабее и до првиот квартал од 2026 година ќе загуби уште околу 9 отсто од вредноста, што за Европа претставува шанса за поповолни доларски инвестиции.

 

„Енвидија“ и биткоинот на нови рекорди

Технолошкиот гигант „Енвидија“ (Nvidia) достигна пазарна вредност од четири билиони долари, со принос од 21 отсто во долари од почетокот на годинава. Акцијата моментално се тргува за 162,88 долари, односно 139 евра. И покрај волатилноста, аналитичарите очекуваат понатамошен раст, со целна цена од 185 до 210 долари во наредните 12 месеци.

Биткоинот, пак, го проби прагот од 112.000 долари, поставувајќи нов рекорд во долари. Аналитичарите од „Битфајнекс“ (Bitfinex) предвидуваат дека до средината на 2025 година биткоинот би можел да достигне вредност од 145.000, а до 2026 година и до 260.000 долари. И покрај ентузијазмот, се нагласува дека биткоинот останува високоризична, шпекулативна инвестиција.

 

Фокусот се насочува кон сезоната на резултати

Иако царинските прашања и геополитиката доминираа во изминатиот период, аналитичарите веруваат дека следниот важен сигнал за пазарот ќе биде сезоната на објавување финансиски резултати. Првите извештаи од големите американски банки се очекуваат веќе следната недела.

Се очекува раст на добивките од 5 отсто, но постои загриженост дека повисоките трошоци предизвикани од новите царини ќе почнат да влијаат врз профитабилноста на компаниите. Доколку маржите се намалат, акциите би можеле да изгледаат преценето.

Движење на цената на биткоинот во долари

 

Движење на цената на биткоинот во евра

 

Пазарот е биковски, но... до кога?

Иако ентузијазмот расте, не треба да се заборави дека пазарната алчност ретко трае долго. Историјата покажува дека ваквите фази честопати им претходат на корекции.

Прашањето не е дали ќе има промена во расположението – туку кога и со каква сила.

Во моментов нема коментари за веста. Биди прв да коментира...

Остави коментар