Преглед на берзите: Акциите во подем пред извештајот на „Палантир“

Американските акции се подготвени да го продолжат растот, додека „Палантир“ (Palantir Technologies Inc.) треба да ги објави финансиските резултати, а инвеститорите неделава се насочуваат кон приватни податоци за насоки околу каматните стапки.

Фјучерсите на S&P 500 пораснаа за 0,4 отсто, сигнализирајќи цврст почеток на ноември по шестмесечниот раст на американскиот референтен индекс. „Палантир“, една од најголемите добитнички од бумот на вештачката интелигенција, со раст од 165 отсто, беше подготвена за нов скок пред објавата на резултатите по затворањето на берзата. Европските и азиските акции исто така пораснаа. Глобалните обврзници останаа речиси непроменети, при што приносот на 10-годишните американски државни обврзници изнесуваше 4,09 отсто. Златото го загуби почетниот раст како што ослабна интересот за безбедни вложувања, додека доларот остана стабилен.

Растот на акциите продолжува додека пазарите ги занемаруваат загриженостите околу трговските војни и високите процени, а добивките на технолошките гиганти го поттикнуваат оптимизмот околу вештачката интелигенција. Приватните економски податоци за време на владинoто затворање, кое се очекува да стане најдолго во историјата – ќе бидат во фокусот, откако претседателот на Федералните резерви, Џером Пауел, предупреди дека е прерано да се очекува намалување на каматните стапки во декември.

„Растот на профитот е присутен, а пазарот сè уште покажува сила, иако макроекономските услови се нестабилни, работите се движат во добра насока“, изјави Андреа Габелоне, директор за глобални акции во „КБЦ глобал“ (KBC Global Services). „Не гледам причина зошто растот да не се консолидира, па дури и да продолжи нагоре.“

Профитот на компаниите од S&P 500 генерално ги надмина прогнозите

Bloomberg

Показатели за состојбата на пазарот на трудот може да произлезат од индексите на Институтот за менаџмент на набавки (Institute for Supply Management) за производство и услуги, кои ќе бидат објавени о понеделник и среда, а потоа и од податоците на АДП (ADP), кои се очекува да покажат умерен раст на приватното вработување во октомври. В четврток „Челенџер, Греј & Крисмас“ (Challenger, Gray & Christmas) ќе ги објави најавените отпуштања на работници.

Трговците исто така ќе ги следат изјавите на неколку претставници на Федералните резерви. Членката на Одборот на гувернери Лиза Кук треба да говори за економијата и монетарната политика в понеделник, а Алберто Мусалем, Џон Вилијамс и Стивен Миран ќе настапат на одделни настани до крајот на неделава.

Иако третото намалување на каматните стапки за 2025 година во декември претходно се сметаше за сигурно, претпазливиот став на Пауел и построгиот тон на другите претставници на Федералните резерви ги натераа трговците да ги намалат очекувањата за понатамошно олабавување. Паричните пазари сега проценуваат околу 60 отсто веројатност за едно намалување следниот месец и околу две дополнителни намалувања до истекот на мандатот на Пауел во мај.

„Имаше одредено разочарување по изјавите на претседателот на Федералните резерви, но пазарот ќе го ‘свари’ тоа и ќе се пренасочи“, изјави Гијермо Хернандес Сампере, раководител на тргување во компанијата за управување со средства МППМ (MPPM). „Понатамошните движења на пазарот на трудот потоа ќе бидат во фокусот.“

Корпорациски вести:

„Алфабет“ (Alphabet Inc.) повторно се враќа на европскиот пазар на обврзници годинава со продажба во повеќе серии, додека матичната компанија на „Гугл“ собира средства за рекордни капитални вложувања во вештачка интелигенција и инфраструктура за облак.

Акциите на „Давиде Кампари-Милано“ (Davide Campari-Milano NV) паднаа откако италијанските обвинители во петокот наредија заплена на околу 1,3 милијарда евра (1,5 милијарда долари) во акции од холдингот што го контролира производителот на пијалаци.

Паричните резерви на „Беркшир Хатавеј“ (Berkshire Hathaway Inc.) достигнаа рекордни 381,7 милијарда долари во третиот квартал, а оперативната добивка скокна за 34 отсто во конгломератот на извршниот директор Ворен Бафет.

ББВА (BBVA SA) планира да собере дополнителен капитал од нивото Тиер 1 за првпат откако акционерите минатиот месец ја отфрлија нејзината неуспешна понуда за преземање на домашниот конкурент „Банко Сабадел“ (Banco Sabadell SA).

Главни движења на пазарите

Акции

• Фјучерсите на S&P 500 пораснаа за 0,4 отсто во 5:50 часот по њујоршко време
• Фјучерсите на Nasdaq 100 пораснаа за 0,6 отсто
• Фјучерсите на Dow Jones Industrial Average останаа речиси непроменети
• Stoxx Europe 600 порасна за 0,5 отсто
• MSCI World Index беше речиси непроменет

 

Валути

• Bloomberg Dollar Spot Index остана речиси непроменет
• Еврото падна за 0,2 отсто, на 1,1515 за долар
• Британска фунта падна за 0,2 отсто, на 1,3130 за долар
• Јапонскиот јен ослабе за 0,1 отсто, на 154,17 за долар

 

Криптовалути

• Биткоинот падна за 2,5 отсто, на 107.219,83 долари
• Етерот падна за 4,1 отсто, на 3.703,14 долари

 

Обврзници

• Приносот на 10-годишните американски државни обврзници остана непроменет, на 4,09 отсто
• Германскиот 10-годишен принос се зголеми за еден базичен поен, на 2,65 отсто
• Британскиот 10-годишен принос беше речиси непроменет, на 4,41 отсто

 

Суровини

• Суровата нафта ВТИ порасна за 0,3 отсто, на 61,19 долари за барел
• Златото на спот-пазарот падна за 0,2 отсто, на 3.996,42 долари за унца