Преглед на пазарите: Технолошките акции ја креваат берзата на стартот на 2026, среброто во подем

Акциите ја отворија новата година со тоа што вештачката интелигенција и производителите на чипови повторно доминираат во движењата на пазарите. Благородните метали, уште еден „жешок“ сегмент на пазарот во 2025 година, исто така забележаа раст.

Азиските берзи пораснаа за 0,9 отсто, при што интернет-и чип-акциите зајакнаа, а регионалниот технолошки индекс достигна рекордно ниво. „Самсунг електроникс“ (Samsung Electronics Co.) се искачи на историски максимум. „Баиду“ (Baidu Inc.) порасна за 7,5 отсто откако чип-подружницата на компанијата поднесе апликација за ИПО, додека дизајнерот на ВИ-чипови „Шангај Бирен“ (Shanghai Biren Technology Co.) забележа двојно зголемување на вредноста на своето деби на берзата во Хонг Конг.

Фјучерсите на индексот Nasdaq 100 пораснаа за 0,7 отсто, додека договорите за европските берзи укажуваат на послаб старт на тргувањето.

Фокусот беше насочен кон суровините, при што цената на златото на спот-пазарот порасна за 1,3 отсто, а среброто скокна за 2,5 отсто, со што ги забележа најсилните годишни резултати уште од 1979 година. Растечки тренд имаше и бакарот.

И покрај поновата корекција, глобалните акции во 2025 година го забележаа најсилниот годишен пораст од 2019 година, потпирајќи се на очекувањата за повисоки добивки и оптимизмот околу ВИ-технологиите. Сепак, неизвесноста околу монетарната политика на САД и високите проценки кај технолошките компании и понатаму претставуваат клучни ризици за пазарите.

Американските берзи успешно поминаа низ година полна со турбуленции

Bloomberg

„ВИ е главната инвестициска тема за азиските инвеститори на првиот трговски ден во 2026 година — а веројатно и за целата година,“ вели Веј-Серн Линг, извршен директор во „Јунион банкер“ (Union Bancaire Privee). Компании како „Тајван семикондактор“ (Taiwan Semiconductor Manufacturing Co.) и „Самсунг“ се како „копач и лопата“ за ВИ-индустријата, со висока прогноза на заработката оваа година имајќи ги предвид плановите за капитални инвестиции на американските технолошки гиганти.“

Технолошките акции и вештачката интелигенција беа меѓу доминантните теми во 2025 година, помагајќи му на пазарот на акции да се опорави по падот во април предизвикан од рекордно високите царини на САД воведени од претседателот Доналд Трамп. Азиските компании влегоа во заеднички вложувања со производители на чипови како „Енвидија“ (Nvidia Corp.), што ја охрабри инвеститорската еуфорија и нов бран слични партнерства.

Индексот Nasdaq 100 минатата година порасна за 20 отсто, што е трета последователна година на раст. Акциите на „Енвидија“ пораснаа за 39 отсто, „Самсунг“ забележа раст од 126 отсто, а „ТСМС“ (Taiwan Semiconductor Manufacturing Co.), 44 отсто.

Во ноември, пак, извршни директори од Волстрит предупредија дека инвеститорите треба да бидат подготвени за пад на берзите поголем од 10 отсто во наредните 12 до 24 месеци, поради загриженост околу надуените вреднувања и можните балони кај технолошките компании.

„Она што го гледаме денес е продолжение на растечкиот тренд кај акциите, при што ВИ и технологијата повторно се во фокусот,“ вели Тим Вотерер, главен пазарен аналитичар во „КЦМ Трејд“(KCM Trade). „Трговците сѐ уште се расположени за купување, а голем дел од оптимистичките теми од 2025 година се прелеваат и во 2026.“

Во други сегменти од пазарот, криптовалутите зајакнаа, додека државните обврзници на Австралија забележаа пад, заедно со индексот на доларот. Со американските државни обврзници немаше готовинско тргување во азиската сесија поради празник во Јапонија. Пазарите во Кина исто така беа затворени.

Иако азиските берзи годинава започнаа позитивно, истражувачката куќа „Биспоук инвестмент“ (Bespoke Investment Group) предупреди дека не треба да се очекуваат силни перформанси на пазарот на првиот трговски ден во новата година.

Според анализа на истражувачката куќа „Биспоук инвестмент“, од 1953 година наваму, вообичаената промена на индексот S&P 500 на првиот трговски ден од годината е пад од околу 0,3 отсто, при што раст е забележан во помалку од половина од случаите. Се наведува и дека берзата бележи пад на првиот трговски ден во секоја од последните три години.

Сепак, постои и причина за оптимизам. Глобалниот индекс на акции што го пресметува „МСЦИ“ (MSCI) во просек пораснал за 1,4 отсто во месец јануари во последните десет години, а раст бил забележан во шест од тие години, покажуваат податоците на „Блумберг“ (Bloomberg).

„Крајот на 2025 година беше релативно слаб за глобалните пазари, но тоа не ја менува суштината, годината беше многу добра за инвеститорите,“ напиша Кајл Родa, виш аналитичар во „Кепитал.ком“ (Capital.com).

„И, секако, почетокот на секоја нова година го носи истото прашање: дали трендот ќе продолжи? Консензусот е дека - да, ќе продолжи.“

Корпорациски вести:

Се очекува „Тесла“ (Tesla Inc.) денека да објави дека во четвртиот квартал испорачала околу 440.900 возила, што претставува пад од 11 отсто во однос на истиот период лани, според податоците собрани од „Блумберг“ (Bloomberg).

„БЈД“ (BYD Co.) ја оствари својата годишна цел за продажба и најверојатно ја надмина „Тесла“ (Tesla Inc.) како најголем светски производител на електрични возила во 2025 година.

„Дип Сик“ (DeepSeek) објави научен труд во кој претставува поефикасен пристап кон развој на вештачка интелигенција, со што се покажува дека кинеската ВИ-индустрија активно се обидува да се натпреварува со компании како „Опен еј-ај“ (OpenAI), и покрај ограничениот пристап до чиповите на „Енвидија“ (Nvidia).

Главните движења на пазарите:

Акции

• Фјучерсите на S&P 500 пораснаа за 0,4 отсто (во 14:26 часот по токиски време)
• Индексот Hang Seng во Хонг Конг порасна за 2,5 отсто
• Фјучерсите на Euro Stoxx 50 паднаа за 0,5 отсто

Валути

• Индексот Bloomberg Dollar Spot остана речиси непроменет
• еврото остана стабилно на 1,1756 долари
• јапонскиот јен речиси непроменет на 156,84 јени за долар
• офшор јуанот речиси непроменет на 6,9744 јуани за долар

Криптовалути

• биткоинот порасна за 0,3 отсто — на 88.502,78 долари
• етерот порасна за 0,7 отсто — на 3.006,78 долари

Обврзници

• Приносот на 10-годишните австралиски државни обврзници се зголеми за 8 базични поени — на 4,82 отсто

Суровини

• „Вест Тексас“, суровата нафта порасна за 0,5 отсто — на 57,73 долари за барел
• златото на спот-пазарот порасна за 1,4 отсто — на 4.377,90 долари за унца