Доларот достигна едномесечен максимум, акциите нестабилни - берзански преглед

Доларот порасна заедно со приносите од државните обврзници, додека инвеститорите се подготвуваат за извештајот за платите во САД, којшто ќе се објави денеска, како и можната одлука на Врховниот суд за царините на американскиот претседател Доналд Трамп. Фјучерсите на американските акции се нестабилни.

Доларот се искачи на едномесечен максимум и е на пат да ја оствари својата најдобра недела од ноември, додека јенот ги предводеше загубите меѓу главните конкуренти на валутниот пазар. 

 

Европските акции пораснаа за 0,4 проценти. Акциите на „Гленкор“ (Glencore Plc) скокна за седум отсто во Лондон откако компанијата ги продолжи разговорите со „Рио тинто“ (Rio Tinto Group) за откуп. Договорите за S&P 500 малку се променија.

Трговците денеска се подготвуваат за два последователни ризични настани кои можат да го променат расположението на пазарот во блиска иднина, означувајќи еден од најголемите тестови за глобалните акции од нивното закрепнување по падот предизвикан од царините во април. Податоците за платите во САД за декември се особено важни бидејќи ќе понудат индиции за патот на Федералните резерви (Фед) за каматните стапки.

„Пазарите дефинитивно осцилираат малку пред претстојните бројки за работни места во САД и загриженоста околу одлуката на Врховниот суд“, рече Ник Твидејл, главен пазарен аналитичар во „АТ Глобал маркетс“ (AT Global Markets). „Пазарите се претпазливо оптимистички настроени, но ни треба малку стабилност на геополитичкиот фронт и повеќе информации од САД по магливите податоци од затворањето.“

Bloomberg Mercury

 

Економистите анкетирани од „Блумберг“ предвидуваат дека во американската економија во декември се додадени 70.000 нови работни места, што е малку повисоко од претходниот месец, додека стапката на невработеност се очекува да падне на 4,5 отсто. Пазарите целосно предвидуваат најмалку две намалувања на страна на Фед за четвртина процентни поени во 2026 година, додека најголеми шанси за почетно намалување гледаат во април.

Врховниот суд денеска би можел да одлучи и за судбината на повеќето царини на Трамп. Стотици компании веќе чекаат со надеж дека ќе го надоместат својот дел од милијардите долари платени давачки досега.

„Во пресрет на платите и можната одлука на Врховниот суд за ‘реципрочни тарифи’, пазарите се во претпазлив режим“, напиша во белешка Вишну Варатан, раководител на макро истражувања за Азија (без Јапонија) во „Мизухо секјуритис“ (Mizuho Securities).

Што велат стратезите на „Блумберг“?

„Подготвеноста на Трамп директно да интервенира во бизнисот се зголемува од ден на ден и се заканува да го еродира моментумот за акциите и обврзниците. Тоа претставува потенцијална пречка за глобалните пазари, при што американските средства веројатно нема да се движат решително повисоко освен ако темпото со кое претседателот врши влијанија на пазарите“, вели Гарфилд Рејнолдс.

Клучниот елемент во одлуката на Врховниот суд ќе биде дали постои јасен пат дека минатите и идните приходи ќе останат недопрени од царините, што би било позитивно за доларот, напиша Стив Енгландер, раководител на глобалните истражувања за девизниот курс на Г-10 во „Стандард чартерд банк“ (Standard Chartered Bank).

Во другите делови на пазарот, нафтата го продолжи својот раст додека инвеститорите ги следат случувањата во Венецуела и Иран. Среброто и златото не се променија многу.

На крипто пазарот, пак, вредноста на биткоинот падна за 0,5 проценти, на 90.705,9 американски долари, додека етерот загуби 0,2 отсто и сега се тргува по цена од 3.110,17 долари.