Пресврт на пазарите: Хардверот го победува софтверот во ерата на вештачка интелигенција

Вештачката интелигенција во блиска иднина лесно може да ја намали работата на софтверските компании, но за тоа и понатаму ќе и биде неопходен хардвер. Веројатно вака во една реченица може да се опишат причините за тектонските поместувања на берзите каде што деновиве инвеститорите буквално бегаат од акциите на повеќе софтверски компании. Двигател на овој тренд е мислењето дека вештачката интелигенција веќе покажува заби односно дека многу брзо ќе го загрози „софтверот како услуга“ (SaaS). Од друга страна, тоа нема да оди толку лесно кога е во прашање хардверската индустрија, без која вештачката интелигенција воопшто не би можела да функционира и во која на стартапите им треба многу повеќе време да се пробијат на пазарот поради потребните инвестиции, синџирите на снабдување и регулаторните барања.

Кулминација на тренд кој трае веќе една година

„Блумберг“ објави дека во изминативе неколку дена, стотици милијарди долари беа избришани од вредноста на акциите на големи и мали компании низ Силициумската долина. Акциите на софтверските компании беа во епицентарот, паѓајќи толку многу што вредноста на оние што се следат во „Ајшерс ЕТФ“ (iShares ETF) сега падна за речиси билион долари во текот на изминатите седум дена. Уште повеќе, овој пораз, за ​​разлика од многу претходни, не беше предизвикан од страв од меур, туку од загриженост дека вештачката интелигенција е на работ да ги замени бизнис моделите на широк спектар компании за кои прогнозерите долго време предвидуваа дека се во опасност.

„Не мислам дека е претерана реакција“, рече Мајкл О’Рурк, главен пазарен стратег во „Џонстрејдинг“ (Jonestrading). „Две години зборуваме за тоа како вештачката интелигенција ќе го промени светот и дека е повеќегенерациска технологија. Во изминатите неколку недели видовме знаци за тоа во пракса“, пренесе „Блумберг“.

Искрата беше безопасна на прв поглед: стартапот за вештачка интелигенција „Антропик“ (Anthropic PBC) објави нова алатка за правна работа - преглед на договори. Сам по себе, производот не се смета за пресвртница - сè уште. Но, по една година во која алатките за кодирање на „Антропик“ помогнаа во трансформацијата на развојот на софтвер - најавата за лансирање на новиот производ беше сфатена исклучително сериозно.

Сепак, нашата анализа покажа дека падот на софтверската во однос на хардверската индустрија тлее веќе подолго време и дека деновиве всушност доживува своевидна кулминација.

Најдобар показател за тоа се соодветните ЕТФ-ови каде што веќе цела година може да се забележи тренд на опаѓање кај оние кои се поврзани со софтверски компании и раст кај оние што се поврзани со хардверски компании. Слична е состојбата и кај S&P индексите кои се поврзани со соодветните индустриски групи.

Розови прогнози за 2026 година

Всушност, станува збор за огромен пресврт на пазарите со оглед на тоа што со години наназад софтверските компании беа во подем и имаа многу подобри показатели отколку компаниите од хардверската индустрија.

Според „Блумберг интелиџенс“ (БИ), изгледите на глобалната хардверска индустрија во 2026 година е розова, главно поради зголемената побарувачка за сервери базирани на вештачка интелигенција(ВИ).

„Зголемувањето на продажбата на ВИ-сервери ќе доминира во трошоците за хардвер, дури и додека традиционалните ИТ трошоци остануваат претпазливи, а растечките цени на меморијата ги загрозуваат маржите“, напиша во белешка објавена на терминалот на „Блумберг“, Во Јин Хо, постар индустриски аналитичар во тимот за технологија на БИ.

Оттаму сметаат дека глобалните приходи од ВИ-сервери се на пат да пораснат за 45 проценти на 312 милијарди долари, што претставува 41 проценти од проектираните 762 милијарди долари за трошоци за компјутерски хардвер во 2026 година.

Од БИ целат дека традиционалните ИТ трошоци ќе останат претпазливи во првиот квартал, но надградбите и инфлацијата на опремата помагаат во поддршката на растот од 5-7 проценти кај традиционалните сервери и складирање за „Дел“ (Dell), ХПЕ (HPE), „НетАп“ (NetApp) и „Пјур сториџ“ (Pure Storage).                      

Како една објава од „Алфабет“ влијаеше на пазарот? Кога станува збор за трендовите на пазарот не треба да се занемари како инвестициските одлуки на технолошките гиганти може да влијаат на пазарот. Добар пример за тоа е „Алфабет“, матичната компанија на „Гугл“ која неодамна соопшти дека капиталните расходи ќе достигнат дури 185 милијарди долари оваа година, во споредба со очекувањата на аналитичарите од 119,5 милијарди долари. „Блумберг њјуз“ објави дека очекуваните расходи за 2026 година ќе достигнат повеќе од она што гигантот потрошил во претходните три години заедно. Но, главниот извршен директор Сундар Пичаи ги увери инвеститорите дека трошоците се неопходни. „Гледаме дека нашите инвестиции во вештачка интелигенција и инфраструктурата ги поттикнуваат приходите и растот низ целиот спектар“, рече тој во средата. „Пребарувањето забележа поголема употреба од кога било досега, при што вештачката интелигенција продолжува да води кон експанзивен момент“. По објавата на „Алфабет“, вредноста на акциите на производителите на опрема веднаш се зголеми. „Броадком“ (Broadcom), партнерот на „Гугл“ за производство на чипови беше меѓу најголемите добитници со пораст од 5,8 проценти во претпазарното тргување во четврток. „Блумберг“ објави дека треба да се следат акциите компании кои се занимаваат со производство на меморија и складирање, вклучувајќи ги „Сандиск“ (Sandisk), „Вестерн Диџитал“ (Western Digital), „Сигејт“ (Seagate) и „Мајкрон“ (Micron). „Марвел Технолоџи“ (Marvell Technology) исто така се искачи нагоре, како и провајдерот на услуги во облак „Кор Вив“ (CoreWeave). Производителите на опрема за чипови „Аплајд Метријалс“ (Applied Materials) пораснаа за 2,7 проценти, а „Лам Рисрч“ (Lam Research) за 2,2 проценти. Меѓу другите движечки фактори „Енвидија“ (Nvidia) и АМД (AMD) исто така пораснаа за околу 1,7 проценти. Меѓу компаниите кои треба да се следат, според „Блумберг“ се и производители на опрема за напојување и центри за податоци: „Амфенол“ (Amphenol), „Вернова“ (Vernova), „Вертив“ (Vertiv), „нВент“ (nVent), „Хабел“ (Hubbell) и „Катерпилар“ (Caterpillar). „Исто така, следете ги нуклеарните, ураниумските и водородните компании, бидејќи фирмите се стремат кон напојување на центри за податоци со вештачка интелигенција: „Окло“(Oklo), „Њју Скејл Пауер“ (NuScale Power), „Енерџи Фјуелс“ (Energy Fuels), „Блум Енерџи“ (Bloom Energy), „Некс Ген Енерџи“ (NexGen Energy), „Ураниум Енерџи“ (Uranium Energy), „Камеко“ (Cameco) и „Нано Нуклеар Енерџи“ (Nano Nuclear Energy).