Преглед на берзите: Продолжува падот на акциите и обврзниците

Немирите на Блискиот Исток предизвикаа нови загуби на берзите и пазарите на обврзници. Доларот зајакна. Приносот на британските 10-годишни обврзници достигна највисоко ниво од 2008 година.

Американските акции се движат кон четврта недела на падови, бидејќи инвеститорите - од кои многумина очекуваа кратка војна - се соочуваат со конфликт што ги наруши синџирите на снабдување со енергија и повторно ги разгоре стравувањата од инфлација. Фјучерсите на S&P 500 паднаа за 0,3 отсто. Приносите на двегодишните американски обврзници се зголемија за шест базични поени на 3,85 оттсо. Брент нафтата се тргуваше околу 107 долари за барел.

Иран продолжи со напади врз државите од Заливот дури и откако Израел сигнализираше дека ќе се воздржи од напади врз енергетските постројки на Исламската Република. „Аксиос“ објави дека САД размислуваат да го преземат островот Харг во Иран, клучен извозен пункт за нафта, за да извршат притисок врз Техеран да го отвори Ормускиот теснец.

Американските трговци со акции се подготвуваат и за необично голем број на истекувања на опции во петок. Околу 5,7 билиони долари во номинални опции поврзани со поединечни акции, индекси и фондови се очекува да истечат, што  е најголемо истекување во март од 1996 година, според податоците на „Сити груп“.

„Се наоѓаме во ранлива средина во моментов со можни зголемувања на каматните стапки и Брент над 100 долари,“ рече Никола Форест, главен инвестициски директор во „Кандриам“ во Брисел. „Ако Stoxx 600 и S&P 500 не успеат да ги задржат техничките нивоа денес, тоа може да сигнализира претстојни притисоци.“

 

Европскиот Stoxx 600 ги намали претходните добивки од 1 отсто. Приносот на британските 10-годишни обврзници порасна за 10 базични поени на 4,94 отсто, највисоко од финансиската криза. Краткорочните приноси скокнаа уште повеќе. Паричните пазари целосно пресметуваат три зголемувања на каматните стапки од Банката на Англија и Европската централна банка за 2026 година.

Златото се стабилизираше околу 4.650 долари за унца, но остана на пат за најголем неделен пад од почетокот на пандемијата. Благородниот метал е намален за повеќе од 7 отсто оваа недела, најмногу од март 2020 година, бидејќи трговците ги намалија очекувањата за намалување на каматните стапки од централните банки.

Инвеститорите со долгорочни позиции продадоа 9,6 милијарди долари преку трговскиот под на „Голдман“ во четвртокот – што е најголема дневна нето-продажба според податоците на банката од 2022 година. Продажбата беше широка и ги опфати сите сектори, напишаа членовите на тимот Аријана Контеса и Мајк Вашингтон во белешка.

„Пазарот беше во заблуда на почетокот на конфликтот, мислејќи дека ќе заврши брзо,“ рече Дејвид Крук, шеф на трговија во „Ла Финасиер де л’Ешикије“ во Париз. „Инвеститорското расположение очигледно се префрли кон повеќе песимистична позиција.“