Биткоинот го заокружи најдолгиот период на тргување под 20.000 долари

Биткоинот го проби чувствителното ценовно ниво од 20.000 долари, запишувајќи ја на тој начин својата најдолга низа на тргување под тоа вредносно ниво од кога криптовалутата воопшто ја надмина оваа граница кон крајот од 2020 година.

Најголемата криптовалута според својата пазарна вредност порасна за дури 5,3 проценти, на 20.412 долари, забележувајќи ја својата најголема еднодневна добивка од 27 септември. Валутата се тргуваше на ниво под 20.000 долари скоро три недели. Останатите дигитални средства исто така пораснаа, па етерот зајакна за дури 12,8 отсто и се тргуваше за 1.525 долари, што е најголема цена за повеќе од месец дена. Исто така напредуваа и т.н. алткоини, како солана и догкоин.

„Ова мора да ве охрабри“, рече Стефан Олет, извршен директор на „FRNT Financial“.

И покрај добивките, биткоинот и натаму останува во рамки на својот повеќемесечен пад на цената бидејќи централните банки ги зголемуваат каматните стапки со цел да ја зауздаат инфлацијата. Криптовалутата загуби скоро 60 проценти од својата вредност од почетокот на годинава.

Силната корелација на биткоинот со ризичните имоти како технолошките акции ја загуши надежта дека биткоинот ќе служи како заштита од инфлацијата. Криптото се тргуваше во согласност со американските акции во поголем дел од годината.

Но, останува да се види дали биткоинот ќе може да го одржи тргувањето над нивото од 20.000 долари.

„Некои луѓе гледаат на нивото од 20.000 долари како на психолошко значајна граница“, вели Кејти Стоктон, коосновач на „Fairlead Strategies“.

Во моментов нема коментари за веста. Биди прв да коментира...

Остави коментар