Биткоинот над 80.000 долари, највисоко ниво во последните три месеци

Биткоинот се искачи над 80.000 долари првпат од средината на мај, бидејќи оптимизмот се враќа на долго време потиснатиот криптопазар во услови на сплет од позитивни сигнали што принудија ликвидација на милијарди долари во позиции со финансиска потпора.

Оригиналната криптовалута порасна за дури 2,9 отсто, на 81.257 долари во вторникот во Азија, ниво последен пат забележано на 15 мај. Растот следува откако биткоинот скокна за 23 отсто во седумте дена заклучно со неделата, што е најголем неделен раст во последните околу три години. Сепак, токенот останува далеку под својот врв од околу 126.000 долари, достигнат во октомври.

Биткоинот повторно е во фокусот на инвеститорите откако разговорите за тргувањето засновано врз обезвреднувањето повторно оживеаја по минатонеделната најава на американскиот министер за финансии Скот Бесент дека САД ќе го засилат откупот на обврзници во обид да ги намалат долгорочните приноси, што предизвика нов бран продажба на доларот. Скептиците го оценија планот како уште еден доказ дека администрацијата на Трамп сè уште не е подготвена да ја преземе тешката задача за намалување на буџетскиот дефицит.

Биткоинот првично беше создаден како начин за заштита од обезвреднувањето на фиат-валутите и инфлацијата поттикната од создавањето пари од страна на централните банки.

„Макроекономското опкружување стана поповолно откако проширениот план на Министерството за финансии за откуп на долгорочен долг помогна да ослабне доларот и повторно го оживеа ‘тргувањето засновано врз обезвреднувањето’ кај биткоинот и златото“, рече Лејси Жанг, аналитичарка во „Битгет волет“ (Bitget Wallet).

Биткоин-ЕТФ привлекоа најголеми приливи во последните 10 месеци

 

Забелешка/Податоци за 13 спот биткоин-ЕТФ котирани во САД заклучно со 21. август/Извор: Bloomberg

Спот биткоинските берзански тргувани фондови минатата недела забележаа најголем неделен прилив во последните 10 месеци, во период кога токенот силно порасна. Тринаесетте фондови котирани во САД привлекоа нето 1,92 милијарда долари, најмногу од почетокот на октомври минатата година, покажуваат податоците што ги собра „Блумберг“. Фондовите го забележаа и најголемиот еднодневен прилив во повеќе од три месеци, привлекувајќи 606,3 милиони долари на 20 август.

Криптопазарот доби дополнителен поттик на денот на објавата на Бесент, кога претседателот Доналд Трамп се сретна со лидерите во индустријата. Средбата повторно го разбуди оптимизмот во врска со посветеноста на администрацијата кон криптовалутите. Законодавниот процес неодамна забави откако Законот за јасност, предлог-закон за структурата на пазарот, не беше ставен на гласање пред августовската пауза на Сенатот. Трамп го повика Сенатот да го усвои предлог-законот, а се очекува тој повторно да биде разгледан во средината на септември.

Последователниот скок на цената на биткоинот затекна многу трговци неподготвени. Минатата недела беа ликвидирани околу 7,2 милијарди долари песимистички позиции со финансиска потпора во сите криптосредства, покажуваат податоците на „Коинглас“ (Coinglass).

Трговците со криптовалути со месеци се обидуваат да го пронајдат дното на пазарот. Биткоинот паѓаше во поголемиот дел од 2026 година, по распродажбата во октомври минатата година, која следуваше непосредно откако токенот го достигна историскиот максимум.

Сепак, скептицизмот останува. Аналитичарите укажуваат на затворањето на кратките позиции како главен двигател на растот на цените, што посочува дека побарувачката можеби нема да се одржи.