Биткоин-рударот „Риот“ ќе му обезбедува компјутерска моќ на „Антропик“ за девет милијарди долари

„Антропик“ (Anthropic PBC) склучи договор вреден 9,1 милијарда долари со „Риот платформс“ (Riot Platforms Inc.), компанија за рударење биткоин која неодамна почна да продава капацитети во центри за податоци за ВИ, изјавија лица запознаени со ова прашање, што ги нагласува напорите на креаторот на Клод да обезбеди доволно компјутерска моќ за да ја задоволи побарувачката на своите клиенти.

„Риот“ претходно во понеделникот објави дека обезбедил 20-годишен договор за снабдување со 191 мегават капацитет - доволно за снабдување со електрична енергија на околу 143.000 домови во секој момент - од својот кампус во Рокдејл, Тексас, за „водечка компанија во областа на најнапредната ВИ“. Таа компанија е „Антропик“, изјавија лицата, кои побараа да не бидат именувани бидејќи разговараат за приватни информации.

„Риот“ одби да коментира. „Антропик“ не одговори на барањето за коментар. Акциите на „Риот“ скокнаа за 25 отсто, на 24,40 долари, во доцното тргување по веста за договорот со „Антропик“.

„Антропик“ во последните месеци склучи неколку договори со добавувачи на облачни компјутерски услуги за ВИ за да ги зајакне потребните капацитети, откако имаше тешкотии да ја следи побарувачката на клиентите за алатки за ВИ. Компанијата неодамна потпиша договор вреден 10 милијарди долари со инфраструктурниот стартап основан пред само неколку месеци, „Волта инфра холдингс“ (Volta Infra Holdings Ltd.), а во мај се согласи да купи компјутерска моќ во вредност од речиси 45 милијарди долари од „Екс еј-ај“ (xAI) на Илон Маск.

„Риот платформс“ претходно во понеделникот соопшти дека договорот со компанијата за ВИ трае до јуни 2048 година и дека очекува договорот да генерира приходи од 9,1 милијарда долари. Договорот вклучува и опција за негово продолжување двапати, секојпат за по пет години, што би значело вкупна продажба од дури 16,1 милијарда долари.

„Риот“, некогаш производител на дијагностичка опрема за биотехнолошката индустрија кој работеше под името „Биоптикс“ (Bioptix), пред драматично да се пренасочи кон рударење биткоин, е една од неколкуте криптокомпании кои сега преминуваат кон облачно компјутерство за да го искористат бумот на ВИ. Компанијата објави и посебен договор со „АМД“ (Advanced Micro Devices Inc.) за изградба на компјутерски капацитети.

„Риот“ ги надмина очекувањата за продажбата во вториот квартал, делумно благодарение на својот бизнис со центри за податоци.

-Со помош на Дејвид Пан