САД ги укинаа ограничувањата за ВИ модел на „Антропик“

Американската влада ги укина ограничувањата за пристап од странство до моделот за вештачка интелигенција Фејбл 5 (Fable 5) на компанијата „Антропик“, со што повторно се овозможува негова поширока меѓународна достапност, откако компанијата презеде дополнителни мерки за надминување на безбедносните забелешки на администрацијата на американскиот претседател Доналд Трамп. Министерството за трговија на САД на 12 јуни воведе извозни ограничувања со доверлив допис, барајќи „Антропик“ да добие претходно одобрение од американските власти пред да им овозможи пристап на странски државјани до напредниот модел Митос 5 (Mythos 5) и до моделот Фејбл 5, наменет за поширока употреба. Како одговор, компанијата привремено го суспендираше пристапот до двата модела и започна разговори со американските власти за да ги отстрани безбедносните грижи.

„Антропик“ соопшти дека Министерството за трговија ги укинало ограничувањата за пристап до двата модела, додека дел од рестрикциите за Митос 5 веќе биле ублажени на 26 јуни. Истовремено, компанијата најави повторно активирање на Фејбл 5 со нов сет класификатори чија цел е подобро препознавање и блокирање на задачи поврзани со сајбер-безбедноста. Компанијата со седиште во Сан Франциско започнала и развој на рамка за анализа на обидите за заобиколување на безбедносните механизми и за проценка на одговорите на моделот, во соработка со „Амазон“, „Мајкрософт“, „Гугл“ и други партнери во рамки на проектот „Гласвинг“ (Glasswing), мрежа од околу 200 организации на кои им е овозможено користење на моделот Митос за откривање сајбер-ранливости.

Според компанијата, од среда моделот Фејбл 5 повторно ќе биде достапен за корисниците ширум светот преку нејзините платформи, додека пристапот преку облак услуги на „Амазон“, „Гугл“ и „Мајкрософт“ ќе биде овозможен во најкус можен рок. Во меѓувреме, пристапот до моделот Митос 5 веќе е вратен за одредени организации во САД, а „Антропик“ најави дека ќе продолжи да соработува со американските власти за проширување на пристапот и за домашните и за меѓународните членки на проектот „Гласвинг“.

Компанијата оцени дека соработката со американската влада и индустриските партнери може да придонесе за воспоставување заеднички правила за целата индустрија на вештачка интелигенција, кои би биле преточени во регулаторна рамка што подеднакво ќе важи за сите компании кои развиваат најнапредни ВИ модели, со траен и транспарентен процес на државно учество при нивното одобрување за јавно објавување.

Ограничувањата воведени за „Антропик“ отворија поширока дебата во индустријата за тоа дали извозните правила можат да се користат како механизам за регулирање на пристапот до модели за вештачка интелигенција. Во изминатите денови раководството на компанијата, вклучително и коосновачот Том Браун, разговарало со американскиот министер за трговија Хауард Лутник и други владини претставници со цел да се надминат безбедносните грижи поврзани со најновите модели. Клучен услов за укинување на ограничувањата било уверувањето дека компанијата ќе презема проактивни мерки за спречување на злоупотреба и заобиколување на заштитните механизми. Во писмо што Лутник го испратил до „Антропик“ се наведува дека компанијата се обврзала активно да ги спречува и решава безбедносните ризици поврзани со своите модели, како и да соработува со владата при изработка на идните протоколи и стандарди.

„Антропик“ неодамна го претстави Фејбл 5 како прва јавно достапна верзија од класата модели Митос, но со ограничени сајбер-можности и механизми што спречуваат одговарање на одредени прашања поврзани со сајбер-безбедноста и биологијата. Во такви случаи, четботот Клод (Claude) ги пренасочува корисничките барања кон моделот Опус (Opus 4.8).

Иако ограничувањата сега се укинати, тие претставуваа досега најзначајна интервенција на американската влада во комерцијален проект поврзан со вештачката интелигенција и имаа одек низ целата индустрија. Според текстот, тие влијаеле и врз конкурентската компанија „Опен еј-ај“ (OpenAI), која по барање на администрацијата на претседателот Трамп го ограничи претставувањето на својот нов модел ГПТ-5.6, а извршниот директор Сем Алтман изјави дека моделот 5.6 Сол најпрво ќе биде ставен на располагање на избрани партнери одобрени од американската администрација пред да стане пошироко достапен. Воедно, одлуката за ублажување на ограничувањата ги намалува и тензиите меѓу „Антропик“ и администрацијата на Трамп, додека компанијата паралелно води и правен спор со Пентагон поради претходна одлука да биде означена како ризик во синџирот на снабдување.