Битоин ЕТФ-овите со најголем одлив во шест недели, цената на токените стагнира

Спот биткоин фондовите со кои се тргува на берза (ETФ) забележаа најголеми одливи од крајот на јуни минатата недела, прекинувајќи го силниот почеток од стартот на месец август.

Тринаесет фондови котирани на берзата во САД забележаа нето одливи од 389,7 милиони долари во неделата што заврши на 10 август, откако привлекоа 853,5 милиони долари претходната недела, според податоците собрани од „Блумберг“. Првата недела од месецот забележа најголеми неделни приливи во фондовите од април наваму, по редок хак на добро познат бренд на таканаречени ладни паричници што го обнови интересот за заштита на дигиталните средства преку традиционални финансии.

„Нето одливите од ЕТФ-овите од минатата недела одразуваат намалено расположение на пазарот на биткоин“, рече Есме Пау, раководител на пазарите на капитал и политиката во фирмата за безбедност на блокчејн „Сертик“ (CertiK). „Приливите забележани кратко време по хакирањето на „Колдкард“ (Coldcard) сега се чини дека се отстапување, додека поширокото институционално расположение останува претпазливо односно е на граница на песимизам.“

Обновената распродажба на ETФ-овите доаѓа во време кога биткоинот се движи околу 63.000 долари, што е намалување за околу 50 проценти од рекордното високо ниво минатиот октомври. Ризикот од повисоки каматни стапки го одржува расположението претпазливо, додека недостатокот на законодавен напредок во САД за предложениот „Кларити акт“ (Clarity Act - закон за структурата на пазарот на криптовалути) исто така ги турка купувачите настрана.

Приливите во ETФ-овите на биткоин - кои нудат изложеност на цената на биткоинот без да бараат од инвеститорите сами да ги држат или обезбедат токените - беа благо позитивни во текот на трите недели од минатиот месец, но основното расположение на инвеститорите остана кревко.

По неодамнешниот хакерски напад на офлајн паричниците на брендот „Колдкард“, произведени од „Коинките“ (Coinkite Inc.) со седиште во Торонто, некои видоа посилен аргумент за стекнување изложеност на биткоин преку потрадиционални средства. Ранливоста што го направи генерирањето на клучеви на „Колдкард“ предвидливо ја разниша довербата во еден вид паричник кој се претпоставува дека е едно од најбезбедните места за обезбедување криптовалути.

Цената на биткоинот беше во голема мера непроменета минатата недела, останувајќи во тесен опсег од два проценти. Се тргуваше за околу 63.400 долари од 13:30 часот по сингапурско време.

Индексот на имплицитна волатилност на биткоинот, кој ги користи цените на опциите за да ги предвиди 30-дневните осцилации на токенот, беше околу 37 во понеделник, под просекот од 2019 година и далеку под врвот од 82,2 на почетокот на февруари.

Капиталните текови во ETФ-овите се важен индикатор за институционалната побарувачка, бидејќи овие производи се појавија како еден од најголемите канали преку кои традиционалните инвеститори добиваат изложеност на биткоинот. Затоа, подолг период на одлив би можел да изврши притисок врз цените и ликвидноста, особено ако другите главни извори на побарувачка останат пригушени.