Акциите на „Коинбејс глобал“ (Coinbase Global Inc.) паднаа на историски минимум во услови на растечка несигурност на инвеститорите за тоа колку далеку може да се прошират последиците од несолвентноста на ривалската крипто-берза FTX.
Акциите на најголемата американска берза за криптовалути паднаа за дури 10,3 отсто на 40,61 долари пред во понеделникот да затворат на девет отсто, што доведе до пад на другите акции поврзани со криптовалутите. Од почетокот на годината до денес, акциите на Coinbase се намалени за повеќе од 80 отсто, додека вредноста на биткоинот е намалена за 65 проценти. Акциите на Coinbase достигнаа највисоко ниво од 429,54 долари во април 2021 година, откако дебитираа на Nasdaq.
Ваквите резултати се во линија со падот на цените на дигиталните средства, кои потонаа по колапсот на крипто-империјата на Сем Банкмен-Фрид. Биткоинот во понедлникот падна за дури 4,1 отсто на 15.589 долари, нешто помалку од најниското ниво во две години на 9 ноември. Токенот е намален за околу 75 отсто од рекордното високото ниво од речиси 69.000 долари, постигнато пред околу една година. Исто така во понеделникот, етерот падна за цели 5,5 отсто.
Акциите на „Маратон диџитал“ (Marathon Digital Holdings Inc.), „Микро стратеџи“ (MicroStrategy Inc.), „Рајот блокчејн“ (Riot Blockchain Inc.) и „Кор сајентифик“ (Core Scientific Inc.) паднаа и за цели 10 отсто.
„Ако биткоинот падне под 15.500 долари, нема голема поддршка до нивото од 13.500 долари, после кое следи психолошкото ниво од 10.000 долари“, напиша Ед Моја, висок пазарен аналитичар во „Оанда“ (Oanda).
Coinbase има 14 препораки за купување, 12 препораки за задржување и шест препораки за продажба. Банката на Америка во петокот го намали рејтингот на Coinbase од „купи“ на „неутрален“.
„Уверени сме дека COIN не е 'уште еден FTX'“, напиша аналитичарот Џејсон Купферберг во белешка. „Но, тоа не ги прави имуни на пошироките последици во крипто-екосистемот“, додава тој.
Во меѓувреме, фондовите на Cathie Wood's Ark Investment Management купија повеќе од 1,3 милиони акции на Coinbase од почетокот на овој месец.
.webp){kind=icon}
