Според претседателот на Комисијата за хартии од вредност на САД (анг. Securities and Exchange Commission - SEC), Гери Генслер, криптокомпаниите не ги чуваат соодветно средствата на своите клиенти и често ги мешаат со сопствени средства.
„Тоа е доста неусогласено поле“, рече Генслер во интервју за ТВ Блумберг, во емисијата „Баланс на моќ со Дејвид Вестин“ (анг. „Balance of Power With David Westin“). „Тие ги комбинираат средствата на клиентите со своите бизниси“.
Острата процена од страна на највисокото тело за надзор на Волстрит следуваше по неколкумесечните предупредувања од Генслер и американските регулатори за потенцијалните опасности од индустријата за дигитални средства. SEC тврдеше дека многу токени и криптопроизводи се всушност само хартии од вредност со кои се тргува на блокчејнот и треба да се регистрираат во агенцијата.
Bloomberg
Регулаторот во четвртокот објави дека платформата за тргување „Кракен“ (Kraken) се согласила да плати казна од 30 милиони долари за да ги намири обвинувањата дека нејзините производи за залагање (анг. staking) за американските клиенти ги прекршиле правилата на SEC. Фирмата, која исто така се согласи да ги суспендира ваквите услуги во САД како дел од договорот, ниту ги призна ниту ги негираше тврдењата на регулаторот.
Криптозалагањето функционира така што им овозможува на корисниците да генерираат приноси во замена за тоа што ќе дозволат нивните токени да се користат за олеснување на трансакциите на блокчејнот. Како што е случајот со неколку други производи засновани на дигитални средства, SEC посочи дека ова личи на работа со хартии од вредност што треба да се регистрира кај нив.
Во своето интервју за „Блумберг“, Генслер нагласи дека криптоберзите често играат повеќе улоги. Тој посочи дека нивните деловни модели може да создадат значителен конфликт на интереси.
„Не дозволуваме Њујоршката берза дополнително да води хеџ фонд и да тргува на берзата. Зошто би го направиле тоа овде?“, рече Генслер.
Тој изјави дека компаниите треба да очекуваат дополнителни мерки од агенцијата доколку не почнат да ги следат правилата на регулаторот.
.webp){kind=icon}
