text size
Најголемата светска криптоберза „Бајненс“ (Binance) повторно ја потврди својата посветеност кон европскиот пазар, нагласувајќи дека ќе продолжи да работи во согласност со важечките прописи и активно да соработува со регулаторите во процесот на добивање лиценца според новата европска рамка MiCA.
Оваа порака доаѓа во период на засилени дебати околу иднината на криптокомпаниите во Европската Унија, откако стапија во сила новите правила за регулирање на пазарот на дигитални средства. Во јавноста се појавија и информации дека дел од овие компании (меѓу кои и „Бајненс“) би можеле да се соочат со потешкотии при добивањето дозволи за работа според новиот режим.
Регионалниот директор на „Бајненс“ за Централна и Источна Европа, Кирило Хомијаков, изјави дека компанијата останува целосно посветена на европските корисници и на усогласувањето со локалните закони.
„Binance останува посветен на своите европски корисници и ќе продолжи да работи во согласност со важечките закони“, изјави Хомијаков.
Според него, компанијата во изминатите 18 месеци водела конструктивен дијалог со регулаторните институции, вклучително и преку процесот на аплицирање пред Грчката комисија за пазар на капитал (HCMC). Од „Бајненс“ велат дека, според нивните информации, регулаторот ја завршил проверката на апликацијата и оценил дека таа е усогласена со барањата на MiCA.
Компанијата додава дека процесот бил разгледан и на ниво на Европскиот орган за хартии од вредност и пазари (ESMA), а грчкиот регулатор, според нивните сознанија, има намера да продолжи со постапката за лиценцирање и одобрување на една од наредните седници.
|
Што претставува MiCA? MiCA (Markets in Crypto-Assets) е првата сеопфатна регулаторна рамка на Европската Унија за криптосредства и криптокомпании. Нејзината цел е да воспостави единствени правила за работа на криптоплатформите во сите земји-членки, да ја зајакне заштитата на корисниците и да обезбеди поголема транспарентност и стабилност на пазарот. Добивањето MiCA лиценца е од клучно значење за компаниите кои сакаат да нудат услуги низ Европската Унија, бидејќи им овозможува полесно да работат на единствениот европски пазар. Од „Бајненс“ оценуваат дека јасната и предвидлива регулаторна рамка е важна не само за компаниите од секторот, туку и за корисниците и за конкурентноста на Европа во областа на дигиталните иновации. „Остануваме посветени на Европа и подготвени сме да работиме во рамки на правична, предвидлива и вистински усогласена рамка на MiCA. Јасната и доследна регулатива е од суштинско значење за корисниците, за индустријата и за конкурентноста на Европа во сферата на дигиталните средства“, додаде Хомијаков. |
Како дел од напорите за исполнување на регулаторните стандарди, „Бајненс“ наведува дека продолжува значително да инвестира во усогласеност, безбедност и соработка со надлежните институции.
Според податоците на компанијата, таа моментално вработува повеќе од 1.500 лица на позиции поврзани со усогласеност, што претставува околу една четвртина од вкупниот број вработени. „Бајненс“ исто така тврди дека годишно вложува повеќе од 200 милиони долари во активности поврзани со усогласеност и регулаторен надзор.
Компанијата посочува дека во текот на 2025 година помогнала во спречување на потенцијални измами во вредност од речиси 7 милијарди долари, како и во заплена и враќање на повеќе од 131 милион долари незаконски средства на надлежните органи.
Depositphotos
Во меѓувреме, „Бајненс“ го проширува своето регулаторно присуство и надвор од Европа. Компанијата неодамна стана првата криптоберза што обезбедила сеопфатен пакет дозволи во рамките на регулаторниот режим на Глобалниот пазар во Абу Даби (ADGM).
Заложбата за продолжување на европските активности доаѓа во време кога интересот за блокчејн технологијата, криптосредствата и дигиталните финансиски услуги продолжува да расте низ Европа, вклучително и во земјите од Западен Балкан.
Според експертите од индустријата, токму регулаторната сигурност што ја носи MiCA би можела да одигра клучна улога во привлекувањето инвестиции, поттикнувањето иновации и зацврстувањето на позицијата на Европа во глобалната дигитална економија.
.webp){kind=icon}
