.webp){kind=icon}
Американскиот бизнисмен, инвеститор, филмски продуцент и сопственик на НБА-тимот Далас Маверикс, Марк Кубан, чие богатство на почетокот на годинава беше проценето на околу 5,2 милијарди американски долари, беше оштетен за 870.000 долари во криптоизмама.
Аналитичар под псевдонимот Вазкрипто (WazzCrypto) беше меѓу првите што забележаа дека се случува нешто. Според аналитичарот, цел на напаѓачот бил паричник што бил неактивен речиси 160 дена. Отпрвин изгледало дека Марк Кубан го пренесува својот имот во нов паричник. Сепак, неправилностите во шемата на трансакции предизвикале сомнежи.
Кубан успеа да ги задржи криптовалутите што ги имаше на Полигон (Polygon / MATIC), но неговиот паричник беше испразнет од голем број стабилни токени. Вазкрипто објави скриншот од криптопаричници поврзани со Кубан што прикажуваат неколку трансакции со етериум (ETH), тврдејќи дека тие покажале „многу сомнително“ однесување. Подоцнежните објави сугерираат дека милијардерот бил предупреден за наводното хакирање, што го потврди и медиумската куќа „ДЛ њуз“ (DL News), при што своите УСД коинс (USDC) во вредност од два милиони долари ги префрлил на Коинбејс (Coinbase).
„Сигурен сум дека презедов верзија на 'Метамаск' (MetaMask) со некое ѓубре во неа. 'Метамаск' падна неколкупати“, рече Кубан.
Улогата на Марк Кубан во светот на блокчејн-технологијата е значајна. Кубан поддржа значителен број криптопроекти, меѓу кои се издвојува „Опен си“ (OpenSea), и има значајна улога во застапувањето закони за регулирање на криптосредствата во интерес на инвеститорите и компаниите.
Откако немилиот настан стана јавен, извршниот директор на „Бајненс“ (Binance), Чангпенг Жао, сподели информации за тоа како поединците можат подобро да ги заштитат своите криптосредства. Тој сподели сеопфатна статија во која се детализирани превентивни мерки против можни кражби, нагласувајќи дека дури и искусните корисници се ранливи. Во својата објава, Жао ги наведе методите за обезбедување приватни клучеви и овозможување нивно безбедно пренесување до наследниците. Тој во последно време е активно вклучен во истакнувањето на безбедноста на криптосредствата.
Тој на интересен начин истакна дека ништо не е стопроцентно сигурно. „Ако нашата планета биде погодена од астероид, ќе ги загубиме нашите средства, без разлика како ги складираме“, посочи тој. Жао наведе три клучни работи за безбедноста на криптосредствата: заштита од кражба од други корисници, заштита од загуба поради сопственото однесување и обезбедување начини за пренос на други лица во случај на лична недостапност. Тој ја истакна важноста да се користат само големи и респектабилни централизирани криптоберзи.
