Беа потребни нешто повеќе од 18 месеци, но биткоинот конечно се врати на нивото каде што се тргуваше пред настанот што го забрза последниот пад на криптосредствата.
Доминантната криптовалута се зголеми за дури 4 отсто до 37.019 долари во четвртокот. Тоа е највисоко ниво од 5 мај 2022 година - непосредно пред пропаста на стејблкоинот Тера УСД (TerraUSD) што започна верижна реакција од неуспеси низ криптосферата. Биткоинот го заврши своето целосно закрепнување од тој дебакл речиси точно една година откако падот ја достигна својата најниска точка односно кога берзата на Сем Банкмен-Фрид, FTX, поднесе барање за банкрот.
„Со тргувањето со биткоинот над нивото од кога пропадна стабилниот токен Тера, криптитрговците и официјално се ослободија од тие психолошки лузни“, вели Маркус Тилен, раководител на истражување во „Матрикспорт“ (Matrixport).
Биткоинот се врати на нивото каде што се тргуваше пред колапсот на стејблкоинот Тера
Bloomberg
За разлика од претходните циклуси на бум, биткоинот го спроведе овогодинешното закрепнување во комбинација на остри подеми прошарани со долги затишја на ниска нестабилност. За да дојде до тука, мораше да го надмине најсилното монетарно затегнување од страна на Федералните резерви (Фед) во последните четири децении, заедно со сè построгите индустриски регулативи.
Низа наративи го поттикнаа - или се обидоа да го објаснат - извонредното заживување на криптото: биткоинот како заштита од инфлација; како засолниште од американската банкарска криза во март; а неодамна, биткоин за масите во форма на фондови со кои се тргува преку берза, кои најверојатно наскоро ќе бидат одобрени од Комисијата за хартии од вредност на САД.
Краток прозорец од најмалку осум дена се отвори во четвртокот за Комисијата „теоретски да издаде наредби за одобрување“, според белешката на аналитичарите на „Блумберг интелиџенс“, Џејмс Сејфарт и Ерик Балчунас. „Дури и ако одобренијата не пристигнат овој месец, сепак веруваме дека има 90 отсто шанси за одобрување до 10 јануари“, напишаа тие.
Оптимизмот од потенцијалното одобрување од страна на регулаторот, по повеќе од една деценија размислување, го зајакна токенот за повеќе од 120 отсто оваа година па Керолин Маурон, ко-основач на „Орбит маркетс“ (Orbit Markets), гледа одржлив интерес за облози за понатамошен раст на биткоинот. За споредба, глобалните акции пораснаа за скромни 10 отсто во истиот период.
Секако, биткоинот е само на половина пат до враќање на височините од ерата на криптоманијата во 2021 година, кога го достигна врвот од близу 69.000 долари. Но, застапниците за дигитални средства веќе вртат нови наративи за неговата издржливост...
.webp){kind=icon}
