Трговците со биткоини прикочија пред долгоочекуваниот пресврт на Фед

Биткоинот се тргуваше во зелено во средата, пред одлуката за каматната стапка на американските Федерални резерви (Фед), при што се очекува централната банка да ги намали трошоците за позајмување за првпат по четири години. Сепак, трговците со највредната криптовалута на денот на одлуката покажаа поголема претпазливост, па растот на цената на коинот забави во споредба со претходниот ден.

Изворната криптовалута чинеше 60.482 долари во 9.10 часот, што претставува зголемување од 3,35 проценти. Во вторникот, биткоинот во еден момент надмина 61.300 долари, скокајќи над шест проценти. Намалувањето на растот на цените доаѓа во време кога и американските акции бележат слаб раст, па, така, берзанскиот индекс S&P 500 во средата наутро порасна само за 0,03 проценти. Златото исто така поскапе малку (за 0,09 проценти), додека нафтата падна. Приносите од десетгодишните обврзници на американското министерство за финансии скокнаа над два базични поена, на 3,666 проценти.

Инаку, биткоинот се тргува во релативно тесен опсег откако коинот постави нов ценовен рекорд во март од речиси 74.000 долари.

И другите водечки криптовалути исто така забележаа главно добивки во средата. Втората највредна криптовалута, етер, вредеше 2.332 долари (скок од 1,26 процент).

Цената на БНБ (BNB) беше 545 долари (порасна за 1,37 процент), додека кардано се тргуваше за 0,3345 долари (раст за 0,38 проценти), а најпопуларниот мимкоин, доџкоин, се тргуваше за 0,1013 долари (раст од 0,77 проценти). Помеѓу претставниците на дигиталните средства што беа во минус на почетокот на тргувањето во средата беа солана, која чинеше 131 долар (пад од 0,54 проценти) и ХРП (XRP), со цена од 0,5764 долари (пад од 1,4 процент).

Како што изјави аналитичарот на „Блумберг Адрија“ Михаел Блажековиќ, се претпоставува дека Фед в среда ќе ги намали каматните стапки за 25 базични поени. „Иако пазарите се дури и нешто пооптимистични и очекуваат поголемо намалување, сепак сметаме дека е оптимално да се почне со 25 базични поени, па потоа ќе видиме натамошен развој на инфлацијата и на пазарот на трудот“.

Да потсетиме, деновиве пазарите беа понаклонети кон сценариото во кое американската централна банка ќе ја намали стапката за 50 базични поени. На почетокот на неделата се проценуваше дека шансите за ваков потег се 58 отсто, додека, според „Блумберг“, во средата тој процент бил 55 отсто.

По правило, високите каматни стапки ги одвлекуваат инвеститорите и трговците од инвестирање во поризични класи на средства, кои меѓу другото вклучуваат и криптосредства.

Bloomberg Chartmaker

„Сметаме дека Фед ќе ја продолжи политиката на намалување на каматната стапка уште за најмалку 50 базични поени до крајот на годината“, рече Блажековиќ, додавајќи дека американската економија успева да одолее на различни геополитички потреси, додека пазарот на трудот сè уште е доста силен - со постепен пад на новоотворените работни места, што му дава простор на Фед да ги намали каматните стапки за да не се задуши економијата.

Намалувањето во септември ќе дојде по повеќе од една година (од јули 2023 година) задржување на стапките на исто ниво - највисоко во последните 23 години. Претходниот состанок беше одржан кон крајот на јули, кога Федералниот комитет за отворен пазар очекувано повторно гласаше за задржување на референтната каматна стапка во опсег од 5,25 до 5,5 проценти.

Bloomberg Chartmaker

Тогаш претседателот на Фед, Џером Пауел, изрази уверување дека се ближи моментот за намалување на каматните стапки, нагласувајќи дека одлуката ќе биде донесена врз основа на податоците за инфлацијата и пазарот на трудот, ризиците во двете полиња и рамнотежата во која овие ризици ќе се наоѓаат.

Изборите во САД и криптовалутите

Претседателските избори ќе се одржат во Соединетите Американски Држави (САД) на почетокот на ноември, а резултатите од анкетите на јавното мислење моментално се во корист на кандидатката на Демократската партија, Камала Харис. Ова претставува пресврт во годинашната кампања, бидејќи републиканскиот претставник Доналд Трамп водеше во анкетите, додека актуелниот претседател Џо Бајден сè уште беше во трка за реизбор и извесно време откако Бајден се откажа од трката во јули. По ваквиот потег, Бајден веднаш ја поддржа Харис - неговата блиска соработничка и актуелна потпретседателка на САД - во одлуката да се кандидира за претседателка на државата.

Трамп, кој претходно изразуваше скептицизам за криптовалутите, тврдејќи дека не е нивен обожавател и дека нивната вредност не се заснова врз ништо, годинава ја смени својата позиција во претседателската кампања. Цената на биткоинот често скокаше по разните настани поврзани со Трамп, вклучувајќи ги и неуспешниот обид за атентат на неговиот политички митинг во Пенсилванија и неговото ветување дека ќе го отвори патот за развој на криптоиндустријата доколку биде избран за шеф на државата.

„Уште првиот ден ќе го отпуштам Гери Генслер и ќе назначам нов претседател на Комисијата за хартии од вредност (англ. Securities and Exchange Commission - SEC)“, рече Трамп на конференцијата „Биткоин 2024“ во јули. Од април 2021 година Генслер е претседател на SEC, државна агенција што со години укажуваше на недостигот од регулација на криптопазарот и се обидуваше да наметне регулативи во секторот на дигитални средства што ќе го комплицира и ќе го направи поскап бизнисот во таа индустрија.

Претходно месецов биткоинот ослабе по претседателската дебата меѓу Трамп и Харис, бидејќи пазарите проценија дека Харис победи во дебатата, иако нејзините планови за крипто сè уште не се најјасни.

Како што неодамна објави „Блумберг“, таа допрва треба да излезе со детален став за политиката поврзана со криптовалутите. Медиумите потсетуваат дека минатиот месец нејзиниот советник во кампањата изјавил дека начелно ќе ги поддржи мерките за развој на таа индустрија, укажувајќи на нејзиниот постојан интерес за примена на заштитни мерки во таа област.