Чангпенг Жао по притворот во САД: Ќе продолжам да вложувам во блокчејн

Милијардерот Чангпенг Жао вети дека ќе продолжи да инвестира во секторот  блокчејн, како и во вештачка интелигенција (ВИ) и во биотехнологија. Оваа најава беше дел од неговото прво јавно обраќање по ослободувањето од притвор во САД.

Во објава на социјалната мрежа X (поранешен Твитер), за време на викендот, коосновачот на берзата за дигитални средства „Бајненс“ (Binance Holdings Ltd.) се опиша како долгорочен инвеститор, кој е повеќе заинтересиран за „влијанието отколку за повратот на инвестициите“.

„Бајненс“ во ноември беше казнет со 4,3 милијарди долари според договор за признавање вина во рамките на обвиненијата од американските власти, поради тоа што берзата им овозможувала на криминалци и терористички групи да ја користат нејзината платформа. Жао се согласи да плати лична казна од 50 милиони долари и подоцна беше осуден на четири месеци притвор. Тој беше ослободен од затвор во Калифорнија на 27 септември.

Жао изјави дека неговиот нов потфат наречен „Гигл академи“ (Giggle Academy - непрофитна онлајн образовна платформа) ќе биде значаен дел од неговиот живот. Исто така рече дека ќе посвети повеќе време и пари на добротворни цели.

„Бајненс“ е најголемата светска криптоберза, што ја прави клучен играч во трговијата со дигиталните средства и поврзаните деривати. Според договорот за признавање вина, Жао се повлече од функцијата извршен директор, препуштајќи му го раководството на Ричард Тенг. Американското министерство за правда и Управата за финансиски криминал при Министерството за финансии со години го следат работењето на платформата.

Жао има нето-богатство поголемо од 30 милијарди долари, според индексот на милијардери на „Блумберг“ (Bloomberg), што најверојатно го направи најбогат затвореник во САД.

Во моментов нема коментари за веста. Биди прв да коментира...

Остави коментар