Биткоинот пак над 100 илјади долари откако попуштија трговските тензии

Биткоинот ја надмина границата од 100.000 долари за првпат од февруари, поттикнат од очекувањата за намалување на глобалните трговски тензии.

Најголемото дигитално средство порасна за над пет отсто, на 104 илјади долари, до околу 8 часот утрово, додека повеќето други големи токени забележаа уште поголем раст. Биткоинот достигна рекорд од околу 109.000 долари на 20 јануари, денот кога американскиот претседател Доналд Трамп беше инаугуриран за втор мандат. Подоцна падна за 30 отсто, откако неговите царини кон цел свет предизвикаа турбуленции на глобалните финансиски пазари.

„Ова зборува за огромната побарувачка за дигитални средства, особено за биткоин“, изјави Космо Џианг од „Пантера капитал“ (Pantera Capital). „Има сè повеќе купувачи. Исто така ја гледаме и предноста на дигиталните средства во тоа што не можат да бидат подложени на царини. Тие се и несуверен чувар на вредноста. Во време на економски турбуленции, дигиталните средства имаат корист“.

Трамп во четвртокот објави договор со Обединетото Кралство, наведувајќи дека целосните детали ќе бидат договорени во наредните недели. Според договорот, Обединетото Кралство ќе го забрза протокот на американските стоки низ царинските процеси и ќе ги намали бариерите за извоз на земјоделски, хемиски, енергетски и индустриски производи.

Ова е прва објава од Трамп за некаков договор откако воведе високи царини за десетици трговски партнери на САД.

Трамп стана поддржувач на дигиталните средства во неговиот втор мандат, отворајќи пат за криптоиндустријата преку стопирање на правните постапки против многу компании од секторот, воспоставување резерва од биткоини, олеснување на регулативата и дури влегување во самиот бизнис. Субјекти поврзани со семејството Трамп ја лансираа платформата за децентрализирани финансии „Ворлд либерти фајненшл“ (World Liberty Financial), издадоа стабилен коин поддржан од доларот и мемекоини со ликовите на претседателот и првата дама Меланија Трамп.

Претседателовата поддршка не беше без контроверзии. Милионите долари профит што веќе ги оствариле Трампови го загрозуваат брзото донесување на двопартискиот закон за стабилни коини, кој го поддржуваат и криптоиндустријата и Белата куќа.

Сепак, очекувањата за уште поголеми добивки предизвикаа бран нови компании што инвестираат во биткоин и други криптовалути. Тоа исто така поттикна бран зделки и планови за иницијални јавни понуди од компании за дигитални средства.

„Сто илјади долари е очигледен психолошки праг“, рече Едвард Чин, коосновач на „Паратексис капитал“ (Parataxis Capital). „Со оглед на сите котирани компании што веќе имаат биткоини во своите трезори и новите што доаѓаат, мислам дека биткоинот ќе се искачи значително до крајот на годината“.

Во четвртокот „Коинбејс“ (Coinbase Global Inc.) се согласи да ја купи „Дерибит“ (Deribit), најголемата светска берза за опции на биткоин и етер, за 2,9 милијарди долари, со оглед дека  најголемата американска криптоберза се обидува да навлезе на пазарот на финансиски деривати.

„Со пробивањето на психолошката бариера од 100.000 долари, ќе видиме капитал што ќе го следи овој биковски замав“, рече Дариус Сит, основач и директор за инвестиции во инвестициската криптокомпанија „Кју-си-пи“ (QCP).

Во моментов нема коментари за веста. Биди прв да коментира...

Остави коментар