„Коинбејс“ со поголеми приходи, но речиси без добивка во првиот квартал

Приходите на „Коинбејс“ (Coinbase Global Inc.) за првиот квартал скокнаа, а добивката се намали, додека најголемата американска криптоберза се справува со нестабилноста на цените на пазарот на дигитални средства.

Приходите се зголемиле за околу 24 отсто, на 2 милијарди долари, во однос на истиот период минатата година, иако биле околу 10 отсто пониски во споредба со четвртиот квартал од 2024 година, соопшти компанијата од Сан Франциско во објава на блог во четвртокот. Според просечната прогноза на аналитичарите анкетирани од „Блумберг“, се очекуваа приходи од 2,105 милијарди долари.

Нето-добивката падна за цели 94 отсто, на 66 милиони долари, или 24 центи по акција. Најголемиот дел од падот се должи на тоа што „Коинбејс“ ги означил своите криптопоседи според тековната пазарна цена. Акциите на „Коинбејс“ паднаа за околу 2 отсто во тргувањето по работното време и се намалија за 17 отсто од почетокот на годината.

Компанијата забележа втор највисок број на месечни активни корисници во кварталот, изјави финансиската директорка Алесија Хаас во интервју. Многу од овие корисници не само што тргуваат,туку користат и други услуги од „Коинбејс“, како што е стејкингот.

„Го зголемуваме уделот на пазарот, нудиме корисност“, рече Хаас. „Сведочиме на здраво созревање на нашите производи“.

Во тековниот квартал „Коинбејс“ започнува пилот-програма што ќе им овозможи на компаниите да вршат уплати и исплати со стабилни коини, изјави извршниот директор Брајан Армстронг за време на разговор со инвеститорите. Претходно во текот на денот демократите во Сенатот го блокираа долгоочекуваниот закон за стабилните коини поради загриженост околу криптоангажманите на претседателот Доналд Трамп.

„Коинбејс“ се обидува да ја намали зависноста од позитивното инвеститорско расположение преку проширување на услугите и навлегување во нови сектори. Пред почетокот на тргувањето во четвртокот, компанијата објави дека се согласила да ја купи „Дерибит“ (Deribit), најголемата светска берза за опции на биткоин и етер, за 2,9 милијарди долари.

Ова е најамбициозниот обид досега на „Коинбејс“ да навлезе на пазарот на деривати, при што „Дерибит“ речиси ги удвои своите трговски волумени минатата година, на речиси 1,2 трилион долари. Веста доаѓа на денот кога биткоинот надмина 100 илјади долари за првпат од февруари, поради олеснување на глобалните трговски тензии.

„Ова е најголемата зделка на спојување и аквизиција во историјата на криптото“, напиша аналитичарот на „Кантор“ (Cantor), Брет Кноблаух. „Веруваме дека ова е аквизиција со оцена A+ за коинот“.

Во писмо до акционерите, „Коинбејс“ соопшти дека во април генерирал околу 240 милиони долари приход од трансакции. За вториот квартал компанијата очекува приходите од претплати и услуги да бидат меѓу 600 и 680 милиони долари, при што се очекува растот од стабилните коини да биде надминат од пад на приходите од блокчејн-наградите поради пониските цени на средствата.

Приходите од стабилниот коин USDC на „Сркл“ (Circle), од кого „Коинбејс“ добива дел, се зголемиле за 32 отсто во првиот квартал, на 298 милиони долари. Овој раст делумно бил ограничен од пониски просечни каматни стапки, соопшти компанијата.

Криптовалутите доживеаја раст претходно годинава кога криптопријателот Трамп стапи на функцијата. Тој брзо ги замени клучните челници на агенциите со луѓе наклонети кон криптото. Комисијата за хартии од вредност ги затвори истрагите и постапките против повеќе криптокомпании. Потоа, глобалните царини почнаа да влијаат и на криптото и на други класи на средства. Но, во поново време, водечкиот биткоин го врати поголемиот дел од изгубената вредност.

„Во првата половина на април пазарот сè уште беше слаб, но во последните неколку недели почна да закрепнува“, рече аналитичарот Овен Лау од „Опенхајмер“ (Oppenheimer & Co. Inc.) во интервју пред објавувањето на резултатите. „Април сè уште е благо повисок од март“.