Фонд што не го цени биткоинот вложил милијарди токму во биткоин фирма

Биткоинот не е погоден за долгорочни инвеститори. Дигиталните средства се повеќе шпекулации отколку инвестиции. Тоа е незрела класа на средства со мала историја и без суштинска економска вредност што може да предизвика хаос во портфолијата.

Тоа е мислењето на лидерите на „Вангард“(Vanguard Group), инвестициска групација која ја следи филозофијата на легендарниот Џек Богл. Оваа филозофија се заснова на верувањето дека инвеститорите треба да инвестираат во ниско-ценовни, пасивно управувани индексни фондови на долг рок, наместо да се обидуваат да го победат пазарот со активно тргување.

Сепак, логиката на пасивното инвестирање го направи „Вангард“ -  фонд којшто менаџира средства во вредност од 10 илјади милијарди долари -  најголем акционер на „Стратеџи“ (Strategy), порано „МајкроСтратеџи“ (MicroStrategy -MSTR). Тоа е компанија која е еден вид „застапник“ на биткоинот.

Од 2020 година, компанијата купи повеќе од 600 илјади биткоини, што денес вредат околу 72 милијарди долари. Нивните акции станаа еден вид алтернативна форма на изложеност на биткоин - особено во годините пред САД да одобрат спот ЕТФ-и поврзани со биткоин, напишаа тие на „Коиндеск“ (Coindesk).

Предводена од крипто евангелистот Мајкл Сејлор, „Стратеџи“ издава долг и акции за финансирање на купувања на криптовалути - модел што многу други компании сега го копираат. Сејлор поседува нешто помалку од 20 милиони акции на компанијата.

Откако „Стратеџи“ се впушти во инвестирање во биткоин во 2020 година, акциите на компанијата пораснаа за околу 3.400 проценти, додека биткоинот „само“ доби малку над 900 проценти во последните пет години.

Според Блумберг, „Вангард“ моментално поседува повеќе од 20 милиони акции на „Стратеџи“, или повеќе од 8 проценти од компанијата. Со тоа ја престигна „Капитал Груп“ (Capital Group) и стана најголем институционален сопственик. Вредноста на овој удел е околу 9,26 милијарди долари.

Акциите се распоредени низ десетици индексни фондови на Вангард и берзански тргувани фондови (ETF), кои следат различни инвестициски стратегии.

Кога спот ЕТФ-и со политика за инвестирање во биткоин беа одобрени во САД минатата година, „Вангард“ јавно објави дека нема да ги дозволи на својата платформа и дека нема планови да лансира свои крипто производи поради нивната „шпекулативна“ природа.

Кој би инвестирал 9 милијарди долари во нешто што е јавно исмејувано?

„Бог има чувство за хумор“, рече Ерик Балчунас, аналитичар во Блумберг Интелиџенс и автор на книгата „Ефектот на Богл“ (The Bogle Effect). „Вангард го избра овој пат. Ако имате индексен фонд, мора да ги поседувате сите акции - добри и лоши, дури и оние што лично не ги сакате или одобрувате.“

„Институционална деменција“, одговори Метју Сигел, раководител на истражувањето на дигитални средства во „ВанЕк“ (VanEck), на X. „Пасивното инвестирање на девет милијарди долари во нешто што јавно го исмејувате не е стратегија“, додаде тој.

 

 

Одговорот на Сејлор: „Има растечка институционална поддршка“

Сејлор изјави за Блумберг: „Фактот што ‘Вангард’ има толку голем удел во ‘Стратеџи’ е силен сигнал за растечка институционална поддршка за биткоинот и корпоративните стратегии за финансии базирани на биткоин. Ова укажува на растечкото прифаќање на биткоинот како легитимна резервна актива во традиционалните финансиски кругови“.

Во понеделник, кога биткоинот скокна на 123.000 долари, акциите на „Стратеџи“ добија уште 3,2 проценти.

Уделот на „Вангард“: состав и ширина на изложеност

Дури и назначувањето на Салим Рамџи за извршен директор минатиот мај - поранешен раководител на „БлекРок ЕТФ-и“ (BlackRock ETFs) и крипто ентузијаст - очигледно не ја промени насоката на компанијата.

„Мислам дека е важно компаниите да бидат доследни во филозофијата што ја поддржуваат и производите и услугите што ги нудат“, рече Рамџи по неговото назначување.

Сепак, уделот на „Вангард“ во „Стратеџи“ не е изолиран случај. Зголемувањето на пасивните фондови што ги следат индексите го направи „Вангард“ најголем акционер во околу 400 компании во S&P 500, објави Блумберг.

Иако „Стратеџи“ моментално не е дел од индексот, неодамна стана дел од Nasdaq 100.

Најголем индивидуален удел има „Вангард“ со својот фонд Total Stock Market Index Fund (VITSX), со 5,7 милиони акции (во вредност од околу 2,6 милијарди долари). Други големи сопственици вклучуваат Extended Market Index Fund (VIEIX), со 3 милиони акции, и Vanguard Growth ETF (VUG), според Блумберг.

Вкупната вредност на сите удели на фондовите „Вангард“ во „Стратеџи“ е околу 9,26 милијарди долари.

Покрај пасивните фондови, некои од активно управуваните фондови на „Вангард“ поседуваат и акции на „Стратеџи“. Еден од нив имаше мал број акции дури во февруари, покажуваат податоците на Блумберг. ЕТФ со симбол на тикер VFMO, кој се базира на фактор на „импулс“, исто така има помал удел.

„Вангард“ предупредува дека овие позиции не мора нужно да одразуваат силни убедувања. Активниот фонд, VSEQX, користи квантитативни модели базирани на математички правила и следи индекс на компании со мала и средна капитализација. VFMO исто така користи модел базиран на правила за рангирање на акциите.

Претставник на „Вангард“  одби да коментира понатаму.