Најголемата американска банка тргнува во освојување на Европа

„ЏП Морган Чејс“ (JPMorgan Chase) е навикнат неговата банка да биде на прво место: „Чејс“ е најголемиот издавач на картички во САД и има најмногу филијали, а со своите награди и препознатливиот син бренд привлекол повеќе Американци од која било друга банка.

Во странство, „ЏП Морган“ се најде на помалку познат терен бидејќи како новајлија се бори за клиенти. Според податоци од извештаи, „Чејс“ во Обединетото Кралство инвестирал повеќе од милијарда фунти, започнал со работа во Германија и планира проширување низ континентот, при што, според лица запознаени со прашањето, ги има на ум Шпанија, Франција, Италија и Холандија.

„Чејс“ во Британија, неговиот прв обид надвор од САД, откри различни предизвици за една од најголемите банки во светот. Извори посочија дека големината на „ЏП Морган“ и утврдените системи понекогаш ги попречувале неговите амбиции да делува слично како други дигитални конкуренти и брзо да воведува нови производи.

„Љубоморен сум“, изјави извршниот директор на „ЏП Морган“ , Џејми Дајмон, на почетокот од годината за „Револут“ (Revolut), еден од неговите најголеми ривали во Европа. „Многу научивме гледајќи некои од тие играчи. И понекогаш мора да станеме побрзи и подобри.“

Од почетокот на работењето на „Чејс УК“ (Chase UK) во 2021 година, „ЏП Морган“ ги намали наградите за клиентите, спроведе неколку отпуштања и полека воведуваше клучни производи, вклучувајќи кредитна картичка, посочија лица кои побараа да останат анонимни бидејќи станува збор за приватни информации.

„ЏП Морган“ го позиционира „Чејс УК“ како „исклучиво мобилна“ банка која може да се натпреварува со новите играчи основани пред околу една деценија, меѓу кои многумина се брзорастечки и технолошки насочени, како и со локални имиња кои сакаат да остават сличен траг.

„Монцо банк“ (Monzo Bank) моментално има повеќе од 15 милиони клиенти во Обединетото Кралство, со што е најголема исклучиво мобилна банка по број на корисници. „ЏП Морган“, во рамки на „Чејс УК“, има околу три милиони клиенти. Според некои други мерки, „Чејс УК“ бил поуспешен. Кон крајот на 2025 година имал речиси 30 милијарди фунти средства, што е повеќе од „Монцо“.

Тоа ја доведе банката на прагот на границата од 35 милијарди фунти поставена од британската влада за таканаречено одвојување на деловното работење (ring-fencing), над која мора да ги оддели своите активности на малопродажното банкарство. Тоа би можело да го ограничи обемот на ново кредитирање што таа единица може да го спроведува.

„ЏП Морган Јуроп“ (JPMorgan Europe), со оглед на својата билансна состојба и британските барања за известување, во следните 12 до 24 месеци ќе мора да одлучи дали ќе влезе во процес на одвојување на работењето, вели едно од лицата.

Затоа „ЏП Морган“ повторно се фокусира на поголемо вклучување на клиентите во своите производи. Сака корисниците да инвестираат преку „ЏП Морган“, а инвеститорите да штедат во „Чејс“. „Чејс“ сака да стане примарна банка на своите корисници и да ја искористи технологијата што ја развива со години, која внатрешно ги носела кодното име „прочект финклауд“ (Project FinCloud), посочуваат лицата.

„ЏП Морган Јуроп“ е клучна подружница за меѓународното работење на „Чејс“. Според податоци од извештајот во британскиот регистар КХ (Companies House), минатата година остварила 114 милиони фунти добивка, што е повеќе од трипати во однос на 2024 година, но сепак само дел од капиталните вложувања на матичната компанија во таа единица. Според проценки на аналитичарите од УБС (UBS), тоа е исто така „значително помалку од британските конкуренти“. Поголемиот дел од добивката е резултат на пониски трошоци и раст на приходите од провизии. Трошоците за маркетинг минатата година се намалиле за околу 36 проценти на годишно ниво, на 91,1 милион фунти.

„ЏП Морган“ сака подобро да ги поврзе своите американски и глобални активности на малопродажното банкарство за да им овозможи на клиентите непречен трансфер на пари, а со тек на време САД би можеле да користат дел од технологијата развиена во Лондон, посочи едно лице.

„Задоволни сме со досегашниот напредок и имаме јасен план за забрзување на растот и на постојните и на новите пазари“, наведе во соопштение портпарол на „ЏП Морган“.

Bloomberg

Побрзо воведување

„ЏП Морган“ го лансираше „Чејс УК“ во 2021 година со значителен почетен интерес. На новите клиенти им понуди поврат на готовина (кешбек) од 1 процент на речиси сите плаќања со дебитна картичка, со ограничување до 15 фунти месечно.

Маркетингот беше засилен и од поддршката на матичната компанија од Волстрит  - нејзините логоа беа поставени на најфреквентните станици на лондонското метро и на опрема за тренинг на фудбалери на четирите британски репрезентации.

Клучно во тој потфат беше развој на сопствен софтвер за натпревар со финтек компании изградени околу апликации. „Чејс УК“ работеше на платформа 10X банкинг (10X Banking), но размислуваше и за развој на софтвер кој потоа би можел да им се продава на други банки што сакаат да создадат дигитални издвоени единици, посочија лица запознаени со прашањето.

Развојот на технологијата траел подолго од очекуваното бидејќи инженерите морале да поминуваат низ различни нивоа на  организацијата за да добијат одобрувања, рекоа лицата. На кредитната картичка ѝ биле потребни месеци за да излезе од тест фаза, додека започнувањето на работењето во Германија исто така траело подолго од очекуваното.

Потоа „ЏП Морган“ во 2025 година нагло ја промени програмата за поврат на готовина за „Чејс УК“, поради што многумина не беа задоволни од стандардната картичка. Неколку вработени беа отпуштени, а компанијата пред започнувањето на работењето во Германија приоритетно ангажира нови инженери во Лондон и Берлин.

Во однос на технологијата, бил напуштен планот за продажба на основната банкарска платформа на други кредитори и фокусот се префрлил на развој на инфраструктура за „Чејс УК“, рекоа лицата. Извештаите покажуваат дека трошоците поврзани со технологијата минатата година се зголемиле.

Имаше и промени во раководството: Саноке Висванатан, кој го надгледуваше „Чејс УК“ додека беше проект под кодното име „Динамо“ (Dynamo), ја напуштил компанијата. Компанијата за водење на меѓународната банка го назначил Марк О'Донован, кој одговара пред Маријан Лејк. 

Неодамна Лејк, раководителка на банкарството за потрошувачи и заедници, најави пензионирање, што започна серија промени во врвот на банката. Трој Рорбах сега го надгледува меѓународното банкарство за потрошувачи и американското банкарство за потрошувачи и заедници.

Чејс 2.0

Апликацијата „Чејс“ во Обединетото Кралство нуди основни банкарски услуги: сметки, алатки за буџетирање, одредени осигурителни производи и бесплатни валутни трансакции. Некои дигитални банки воведоа повеќе функции во своите апликации, како инвестирање во поединечни акции.

„ЏП Морган“ мора да се приспособи на секој нов пазар, бидејќи производите што се успешни во САД не секогаш функционираат во Европа. Во исто време, се соочува со жестока конкуренција  - „Револут“ забрзано се шири кон цел од 100 милиони клиенти, „Монцо“ отвора канцеларии во Шпанија, а „Голдман Сакс“ планира да ја прошири банката „Маркус“ во Ирска.

За да привлече повеќе корисници, „Чејс УК“ ги зголеми наградите, нудејќи два отсто поврат на готовина за секојдневни купувања. Но, бенефициите важат само за клиенти кои месечно ќе направат најмалку 15 плаќања со картичка и ќе одржуваат депозит од најмалку 1.000 фунти. Аналитичарите на УБС сметаат дека клучни приоритети остануваат привлекувањето депозити и зголемувањето на кредитирањето, што би ја подобрило профитабилноста на банката.

Во Германија, „Чејс“ привлекува штедачи со бесплатна штедна сметка и камата од 4 отсто во првите четири месеци. Истовремено, „ЏП Морган“ се подготвува за нова фаза од развојот на „Чејс УК“ под водство на поранешниот менаџер на „Монцо“, Кунал Малани, кој најави „амбициозен план за нови производи за клиентите“.