Фунтата и натаму под притисок, се поизвесен е паритет со доларот

Вредноста на британската фунта во овонеделното тргување се движи малку над паритетот со американскиот долар. Денеска со 1 фунта може да се купат само 1,07 американски долари, додека лани, на пример, фунтата вредеше 1,35 долари.

Британската фунта во понеделникот падна дури и на најниско ниво во однос на американскиот долар. Односот фунта спрема долар беше 1 спрема 1,035. Но, трговците не мислат дека падот на курсот на британската валута го достигна дното, туку очекуваат натамошно слабеење на фунтата.

Инвеститорите се кладат на паритет, односно изедначување на вредноста меѓу овие две валути. Најпесимистичните дури прогнозираат и дека фунтата ќе падне под вредноста на доларот. Ова би било незамисливо во последните неколку векови. Имено, тримесечните договори, кои се обложуваат на пад на вредноста на фунтата имаат најголем раст од 2016 година, додека останатите укажуваат дека постојат 43 отсто шанси дека ќе се постигне паритет до крајот на годината.

Прогнозите на банкарите од Морган Стенли (Morgan Stanley) и Номура Интернешнел (Nomura International) укажуваат дека ќе се постигне паритет меѓу двете валути, односно пад на фунтата во однос на доларот.

„Мислам дека ситуацијата ќе се отежни, иако тоа не го сакам бидејќи заработувам во оваа земја“, вели за Блумберг Интелиџенс, Џордан Рочестер, стратег во инвестиционата банка Номура.

Bloomberg Chartmaker

По петдневниот пад на фунтата на азискиот пазар од скоро 6,5 проценти, денеска вредноста на фунтата бележи благ раст. Само за споредба, ако денес фунтата вреди околу 1,07 долари, во средината од 2021 година вредеше 1,4 долари, додека во 2008 година беше двојно повредна, односно една фунта беше колку два долари. Ваков паритет на двете валутии не е забележан од 1985 година, кога големите сили постигнаа договор за девалвација на американскиот долар.

Дури и минатата недела фунтата беше под притисок од постојаниот раст на американскиот долар. Причина за тоа се делумно високите цени на енергенсите, кои го зголемија трговскиот дефицит на Обединетото Кралство (ОК), а делумно и зголемувањето на каматните стапки од страна на американските Федералните резерви (ФЕД), што привлече инвестиции во Соединетите Американските Држави (САД). За падот на вредноста на фунтата дополнително придонесе и најавата на новата британска премиерка, Лиз Трас, за намалување на даноците за енергенсите, иако најголемо влијание има всушност забавувањето на економијата.

Стравовите на инвеститорите дека најавените потези од премиерката ќе го зголемат и без тоа високиот буџетски дефицит, предизвикаа стампедо меѓу сопствениците на државни обврзници од Велика Британија. Истовремено, можните мерки за стимулирање на економијата во ОК се во спротивност со напорите на тамошната централна банка, која што се обидува да ја заузда инфлацијата преку зголемување на каматните стапки.

Неизвесноста на пазарот на валути доведе до зголемување на премиите за краткорочните опции.

Британскиот гувернер Ендру Бејли рече дека Британската централна банка нема да ги зголеми каматните стапки се додека тоа не е неопходно за сузбивање на инфлацијата. Иако тој со својата изјава се обиде да го смири пазарот сепак, фунтата дополнително ослабна.

Со изјавата на гувернерот е ставен крај на шпекулациите за агресивно зголемување на каматните стапки, со цел централната банка да ја зајакне фунтата, но како што наведуваат оттаму, не е исклучена можноста на следниот закажан состанок банкарите да разгледаат кои ќе бидат идните потези. Од друга страна, финнсиските аналитичари се скептични во поглед на тоа дека итното зголемување на каматните стапки ќе има сериозно влијание врз фунтата.

Стратезите од компанијата Номура ги намалија своите прогнози за фунтата и доларот до крајот на годината и тоа на една фунта за 0,975 долари. Очекуваат дека паритетот ќе се пробие до крајот на ноември. Слични се предвидувањата и на стратезите од Морган Стенли, кои исто така, очекуваат паритетот меѓу фунтата и доларот да се постигне до крајот на годинава.

„Строгата монетарна политика, која што предизвикува загриженост за економскиот раст и фискалната одржливост, дирекно или индирекно, веројатно нема да доведе до јакнење на фунтата“, објасни Дејвид Адамс, валутен стратег од Морган Стенли.

Во моментов нема коментари за веста. Биди прв да коментира...

Остави коментар