Банкмен-Фрид живее со последните 100 илјади долари, по загубата на 26 милијарди

Сем Банкмен-Фрид, кој во еден момент „тежеше“ 26 милијарди долари, вели дека сега нема „речиси ништо“.

Сите средства на пропаднатиот крипто-магнат беа во неговата берза FTX и сестринската трговска куќа „Аламеда Рисрч“ (Alameda Research), а наводно сега останал само со една кредитна картичка поврзана со банкарска сметка со 100.000 долари, рече тој во видео интервју со колумнистот Ендрју Рос Соркин на New York Times DealBook Summit во средата. Кажа дека открива сè и дека нема скриени средства.

Пропаста на Банкмен-Фрид беше брза. За само неколку дена, тој загуби 16 милијарди додека неговата империја се уриваше кон банкрот.

Индексот на милијардери на Bloomberg ја спушти вредноста на неговите удели во FTX и Alameda на нула. Исто така, го отстрани неговиот холдинг Robinhood Markets Inc. од пресметката на неговото богатство по извештајот дека се чувал преку Alameda и дека можеби се користел како колатерал за заеми.

Невозможно е да се потврди дали Банкмен-Фрид ја кажува вистината, а индексот на Bloomberg можеби не ги следи сите негови средства. Во извештај од ноември се вели дека тој имал повеќе од 500 милиони долари со фирми за ризичен капитал, вклучително и „Секвоја“ (Sequoia) и бил инвеститор во медиумскиот стартап „Семафор“ (Semafor). Но, ако тие средства биле чувани преку Almeda, можеби ќе беа збришани од нејзините загуби.