По податоците за инфлацијата во САД, еврото може да дојде на 1,1 долар

Растот на еврото во однос на доларот запре во текот на последниот месец и се движи околу максимумот постигнат во мај. Биковите се надеваат дека податоците за инфлацијата во САД, кои ќе бидат објавени денеска, ќе обезбедат доволно муниција за да ја пробијат таа бариера и да го продолжат напредокот кон вредност од 1,10 долар.

Заедничката валута зајакна за речиси 14 отсто од најниското ниво во последните две децении од 95,36 американски центи во ноември, кога трговците ги сменија облозите за зголемување на стапката од страна на Федералните резерви (ФЕД). Сепак, еврото досега не успеа да се пробие над нивото од 1,0787 долар, достигнато на 30 мај.

Стеснувањето на распонот на приносот на обврзниците меѓу САД и Европа сугерира дека еврото ќе го тестира највисокото ниво од мај, доколку податоците за потрошувачките цени во САД покажат некои очекувани знаци на умереност, според канадската Империјална банка за трговија.

„Пробивањето на мајскиот максимум би можело да доведе до обид парот евро-долар да го пробие највисокото ниво од 25 април од 1,0851 долар, додека над тоа постои силен отпор на 1,0936 долар“, вели Џереми Стреч, шеф за стратегија во CIBC во Лондон.

Еврото сè уште не го надмина највисокото ниво од мај / Bloomberg

Други, пак, очекуваат мечкин тренд.

„Останувам скептичен дека евро-долар може да ги продолжи своите неодамнешни добивки без значителна промена во основната перспектива за парот, имајќи предвид дека веќе изгледа скапо во однос на нашата краткорочна објективна вредност од 1,05“, рече Валентин Маринов, шеф за истражување и стратегија во „Кредит Агрикол ЦИБ“ (Credit Agricole CIB) во Лондон.