text size
Аналитичкиот тим на „Блумберг Адрија“ очекува дека на денешниот состанок банкарите на американските Федерални резерви (ФЕД) ќе донесат одлука за покачување на каматните стапки за 25 базични бодови.
„Очекуваме дека ФЕД ќе ги зголеми каматните стапки за 25 базични бодови, во распон од 4,75 до 5 проценти, бидејќи сметаме дека ФЕД сепак ќе го задржи фокусот на сузбивање на инфлацијата“, прогнозираат аналитичарите на „Блумберг Адрија“.
Тие сметаат и дека ФЕД ќе се обиде да обезбеди алтернативи за поддршка на банките во делот на ликвидноста.
„Со цел да избегне неконтролирано зајакнување на загриженоста околу стабилноста на финансискиот систем, сметаме дека е веројатно ФЕД да ја отвори можноста за краткорочно финансирање на банките по пат на посебни инструменти што обезбедуваат ликвидност, а истовремено да го задржи моделот на квантитативно затегнување во рамките на намалување на билансот до 95 милијарди долари месечно. Со тоа, банкарите на ФЕД би испратиле порака дека се држат до својата примарна улога за постигнување ценовна стабилност и голема вработеност, а на банките со релативно помали вишоци ликвидност им се обезбедува стабилност во работењето дури и во услови на нарушена доверба“. пишува во извештајот на нашиот аналитички тим.
Сепак, аналитичарите не ја отфрлаат можноста ФЕД да не ја промени каматната стапка, но сметаат дека таквиот потег ќе прати лоши сигнали на пазарот.
„Иако, секако, постои можност ФЕД да ги задржи каматните стапки непроменети поради неодамнешната загриженост околу колапсот на банката 'Силикон валеј' (СВБ), сепак сметаме дека задржувањето на стапките може да се протолкува и како недоверба во финансиската стабилност, што исто така може да доведе до дополнителен пад на апетитите за ризик“, заклучуваат аналитичарите на „Блумберг Адрија“.
.webp){kind=icon}
