Главниот извршен директор на „ЏП Морган“ (JPMorgan Chase & Co), Џејми Дајмон, планира да продаде акции што во моментот вредaт околу 141 милион долари, што е прва таква трансакција откако го презеде кормилото на гигантот од Волстрит пред речиси 18 години.
Почнувајќи од следната година, Дајмон и неговото семејство ќе ослободат еден милион од акциите на заемодавецот за финансиска диверзификација и даночно планирање, според регулаторниот поднесок од петокот. Акциите на „ЏП Морган“ затворија на 140,76 долари во четвртокот во Њујорк.
Дајмон „и натаму верува дека изгледите на компанијата се многу силни и неговиот удел во компанијата ќе остане многу значаен“, се наведува во соопштението на „ЏП Морган“. Планираната трансакција, која е предмет на условите од планот за тргување со акции на банката, ќе биде „прва продажба на акции за време на неговиот мандат во компанијата“.
Зголемувањето од повеќе од 250 отсто на акциите на „ЏП Морган“ за време на мандатот на Дајмон помогна директорот да прерасне во милијардер. На почетокот на 2009 година, Дајмон купи 500.000 акции во банката како знак на доверба во услови на пад на акциите. Идентичен потег направи и во 2016 година, при што потроши околу 38 милиони долари за двата круга на купување.
Дајмон и неговото семејство тековно поседуваат околу 8,6 милиони акции на „ЏП Морган“, што значи дека планираната продажба би претставувала помалку од 12 отсто од нивните акции во банката со седиште во Њујорк. Неговото богатство изнесува околу две милијарди долари, според индексот на милијардери на „Блумберг“.
Дајмон е извршен директор со најдолг стаж во голема американска банка. Друг долгогодишен извршен директор - 65-годишниот Џејмс Горман во „Морган Стенли“ (Morgan Stanley) - ќе биде заменет во јануари од страна на копретседателот Тед Пик, со што ќе заврши 14-годишниот мандат. Тој план беше објавен претходно неделава. Шеесет и седумгодишниот Дајмон е на врвот на најголемата американска банка од крајот на 2005 година, а со години се шегува дека планира да остане извршен директор „уште барем пет години“.
„Со оглед на тоа што ова е прва ваква продажба на г. Дајмон откако ѝ се приклучи на компанијата и дека тој е толку важен дел од приказната, сигурни сме дека објавата ќе привлече внимание“, посочија аналитичарите на „Пајпер Сендлер“ (Piper Sandler Cos), Р. Скот Сиферс и Френк Вилијамс. Објавата може да предизвика краткорочна слабост на акциите, велат тие. Сепак, „диверзификацијата секогаш изгледа разумно и не гледаме никаква грешка во одлуката“.
Акциите на „ЏП Морган“ се лизнаа за 1,1 отсто, до 139,20 долари, во 8 часот наутро, на почетокот на тргувањето во Њујорк.
.webp){kind=icon}
Во моментов нема коментари за веста. Биди прв да коментира...